An pawl mila zirlaite thiamna dinhmun zir

Sawrkar laipuia Ministry of Education hnuaia NCERT (National Council of Educational Research and Training) bultumin PARAKH State Educational Achievement Survey (SEAS) buatsaih a ni a. Survey hi pawl 3,6,9 zirlaite tan buatsaih niin, district tina school thlan chhuah 1602-ah survey neih a ni.
SEAS neih zawh takah hian pawl 3 zirlai 10752, pawl 6 zirlai 11436, pawl 9 zirlai 11580, an vaiin zirlai 33768 an tel a. SEAS-ah hian SCERT Mizoram chu implementing agency an ni a, Samagra Shiksha Mizoram chu monitoring agency a ni. Field investigator (FI) atan DIET, IASE, college leh DIET atanga inzir chhuak tawhte hman an ni a, an vaiin mi 1762 thlanchhuah an ni.
Survey atan hian PARAKH, NCERT buatsaih naupangte zawhna (questionaire) chu survey neihna school-ah hian FI ten school tinah kengin an chhan zawh thlengin school-ah an awm a. An chhanna hi lakkhawm nghal niin khaikhawm leh a ni dawn a, hei hian Mizo zirlaite ziak leh chhiar leh chhiarkawpa an pawl mila thiamna an neih dan a tarlang dawn a ni.
Zawhna hi zirlaiten chhan nuam an tiin an hlimpui hle tih thu dawn a ni a. PARAKH-in Sap tawngin state tinah a thawn darh a, state hrang hrangin anmahni tawngin an lo siamtha leh a ni. Mizoramah chuan SCERT-in Mizo tawnga letin survey-ah hian hman a ni a. Hetiang zawhna hi naupang tamtakin an chhan vawikhatna a ni a, zirtirtute pawhin tha an tih thu an sawi a ni.
Hetiang zawhna hi DIKSHA Mizoram portal-ah pawl 1 atanga pawl 5 te chhan turin dah chhuah vek a ni a. Hun lo kalzel turah zirlaiten an zirlai an thiam leh thiam loh tehchhuahna tur zawhna siam chungchangah hmasawnna a thlen beisei a ni.