Sawrkar enkawl zirna in in hma a sawn a ngai

Inthlanpui atana Aam Admi Party candidate-te tana rawn campaign Punjab Education minister chuan sawrkar enkawl school-ah hmasawnna a awm a ngai tih a sawi.
Punjab sawrkara Education leh Higher Education changtu minister Harjot Singh Bain hian Zirtawpni khan Lengpui Airport a rawn thlen hnu ah Govt Lengpui High School a tlawh kawi nghal a. Aizawla thuthar thehdarhtute a kawmnaah, an state-a AAP a sawrkar hmaa sawrkar school ang thoin Mizorama sawrkar enkawl school dinhmun chu a tha lo nia a hmuh thu a sawi. Rei tak ding tawh, school building leh bungrua tlabal tak tak a ni chu AAP rorelna hnuaiah chuan thlak danglam a ni a, mipui nawlpuiin sum seng tlem zawkin an fate sawrkar school-ah an luhtir sup sup mai dawn tih a sawi a ni.
Ram kalphung siamtha turin AAP ah politics field-a la tal rei lo, mi tha tak tak, ‘common man’ tan hmun a tam tih a sawi a. Amah ngei pawh kum 33 chauh a la ni a, a nu leh pa pi leh pu ah politics-a sulhnu nei an la awm lo tih a sawi. Chutiang bawkin Mizorama candidate pali an neih chu zirtirtu, doctor, engineer tih te an nih thu an sawi a ni.
AAP chuan mipui nawlpui nghawng, zirna leh hriselna an ngaipawimawh hle tih Harjot Singh Bain hian a sawi a. Punjab-ah pawh AAP a sawrkar hnu in clinic (Aam Admi Clinic) 600 chuang hawn thar a ni tih a sawi a ni.
AAP Mizoram candidate-te campaign pui tur hian AAP Assam president leh AAP Nagaland president bakah an team ten Aizawl an chamchilh mek a ni.