OCTOBER NI SAWM PAKHAT 2023 LEH KUM 80 BIRTHDAY LAWM
Lalhmangaiha Sailo
Holy Cross Bakery
9436360275
H. Lalthanpuia 71 Director Agri Retd. Dt 5.10.2023 a boral chu a thawhpui thin Mizoram Agri, Horti, Irri Officer pension Association ten Dt. 11.10.23 ah a in Laipuitlangah kan ral a. Amah hi pa nelawm, rualkawm thiam tak a ni a. Kohhran Upa niin Ramthar rawngbawlna lam ngaipawimawh tak mi a ni. Sawrkar hna a chawlhsan hnu hian Thlarau bo zawng (TBZ) ah Field Director-in Madhya Pradesh-ah a thawk zui a, Covid 19 hripui vang khan a lo chhuak a, Cancer natnain a tlakbuak zui tak avangin a rawngbawlna lam chu a chawlhsan ta a ni. Ram hmasawnna tura ei leh bar intodelhna kawngah a thiamnate hman tangkai zel tum tlat a ni a. Sawrkar tharin a chhawr tam hman ta lo hi a pawiin a uihawm takzet a ni. Ka thuziak a lo hmuh changte hian a hlimpui vein mi hi a rawn phone vat tthin a, a lawmawmin min ti tlangnel phah sawt thin.
Thanpuia ral ni Dt. 11.10.2023 ni hian remchanna la in hma deuhah chhuakin, thiante hmuhkhat deuh tawh kum 80 ral kai chin te tlawh hmasa ila tiin ka chhuak a, Pu R Thangkanglova, ka tlawh hmasa ber a, ani hi Laipuitlanga awm ve bawk a ni a, an in kan thleng chu ‘Hei hi Pu Thangkanglova te in a ni em?’ tiin kan au chul a, chhunglam atang chuan ‘ni e, amah pawh a awm e, lo lut rawh’ tiin min lo chhang chu an in sir dawr kawngkhar lam atang chuan ka lut a. Sitting room-ah lo thuin a hma dawhkanah chuan ni tin chanchinbu leh tui in tur te a lo in chhawp a. Kan in chibai a, ‘min hria em?’ kan tih chuan a ngawi vang vang a, keimah ka insawi ta zawk a. An veng ka kal chhan leh kan inhmuh khat tawh avanga han tlawh zawk ka nih thute kan hrilh a, ‘Khawi vengah nge in awm kha?’ tia min zawh te chu chiangkuang taka ka hrilh hnu chuan a nupui nu hleitling, la nula tak leh a fanu te nen chuan kan ti ti ho ta chul a. Pu Kanglova hi Basic Agriculture leh Extension Upper Shillong-a zir chhuak hmasa zinga mi niin, Kolasib CD Block hawn tirha bul tantu zinga mi Gram Sevak hna thawk tanin, Mizoram Bar Association-a Ukil lar tak thawk tura inzir chhuak leh a ni a, chanchin ngaihnawm tak tak sawi tur ngah tak a ni. Kum 80 ral a kai thui ve ta deuh a ni ang, rei vak lo kan inkawm chhung hian a zawh ngai min zawt zing ve tawh khawp mai, a beng te a la chhet lo va, muang mara kawm tham tak chu a la ni na in, thenawm hnai deuhte tih loh chu a thleng tawh meuh lo ni tur a ni. In leh lo nuam takah a khawsa a, tun hma deuhva an Varanda leh kawngkharpuia amah rawn leh hmu tur insulpel zut thin te mitthlaah hmu chungin a kum 80 kai tlin lawmna chibai Bar Association Office a ka va buk ni leh ni tin chanchinbua kum 80 ka tling ve ta tih a ziak te ka hrechhuak a, tunah a bang liam thui hle tawh a ni. A ngaihawmin ni tin office lama hmuh tur a awm ta meuh lo hi khua a ti har khawp mai.
Hemi ni Dt 11.10.23 Pu H. Thanpuia ral tura ka chhuah hma lawk hian Pu F. Lalremsiama IPS Home Commissioner Retd. Ex MLA ZPM Val upa council member senior in min rawn phone a, ani hi ka articles mawl te te ziah ve thin lo chhiar thin leh lo tuipui ve thintu a ni a, H. Thanpuia ralna hun kan hmang zo chu Pu C. Lalniliana Agri Director Retd. Nen Pu F. Lalremsiama kan tlawh haw leh a, hemi nia ka article ziah “Kum 80 i tling tawh em?” tih Aizawl Post a chhuak chu chhiar tumin a darthlalang lens tha leh lian nen chuan dawhkanah alo inchhawp a, chibai te buka chhuah leh mai kan tum nain a teuh lo mai, an nu Pi Tluangi Chaltlang nula hmeltha thin pawh kum 80 a bang liam ve viau tawh nain a la thain a viak a la tha, an naute Buh thap leh a hum lo haiin a phe sek chungin chhang tui tak leh thingpui in loa chhuah a remti lo.
Pu Remsiama in hi ka vawi khat luhna a ni a, a pawn lama a lan ang aiin a chhung han luhin a nuamin a ropui danglam tlat, ngaihtuahna min neih thui tir kher mai. Amah hi IGP Home Commissioner, Ex MLA ni tawh, fate puitling tak tak MCS leh Officer te nei a ni a. Kawngpui an veng chhungah pawh lang larh leh mawi uchuak taka kal vel apiangin hei tu building nge tih tur khawp a sak pawh nise, miten awm reng an ti ang. Mahse a chhung han thlir vel hian a nuam tlat a corrupt lo a ni tih sawi vak a ngai lo, nupa kawpchawiin kum 80 chuang fe niin rei lo te chhung an bula awm a nuamin a khamawm loh khawp mai, an bengte a la chhet lo va, an kal dim deuh tawh e tih loh phei chu sawrkar tharah pawh rawn tlak leh khaipa ber ala ni thei ngei ang. Kan chhuah dawn chuan ‘Pu Siam, ka articles te hi a ho mai mai mang e i ti deuh thin lo maw!’ kan ti chu ‘ti love, hetiang lam thu hi senior upa lam phei hi chuan kan chhiar duh zawng tak a ni alawm! Taka Ruotmawii te nen zaia rawng in bawl hoa Zoram dung leh vang i fanpui chanchinte kha rawn ziak teh a, a ngaihnawm dawn em mai’ te chu min la ti ta deuh deuh va.
Pu Remsiama in atanga kan chhuak chu DIET peng lamah Mizoram a awm hmasa ber kawng chhawng kan ti dawn nge Fly over an ti zawk chunga kan tlan chu kan hlimin kan khek thla uar uar a. Aw!! kan Chief Minister ruahman anga Bawngkawn phei a thirphek ban lian phun a Fly over te han siam hman ni se, Sakawrhmuituai tlang atanga Durtlang – Chaltlang thlenga Rope way an ti nge Sky walk te kha pam tul lovin han siam zo se zawng keini putar kum 80 chunglam ho tan tak hian a va hlu dawn em ti chungin a siam thei ngei tur sawrkar thar lo piang tur beisei chungin kan tlan ta zel a.
Kan in ka zuk thleng chu kan nu Lianhmingthangi Kum 80 tlin lawmin kan veng Zotlang nu 20 dawn chhun tawngtaiho chu Birthday sawhchiar siamin an lo ri map map a, sharing te neiin tawngtai rualna hunte an lo hmang a, an zingah hian kum 90 chung pathum leh kum 80 chin pawh an awm nual mai. Anni ho hi pachang lam hian kan tluk lo, Birthday inlawmpuite, tar khawhar lo tak nih te hi an thiam khawp mai. An zingah hemi nia ka article buatsaih ‘Kum 80 i tling ve tawh em?’ tih chu ka chhiar chhuahsak a, an lawmin tar khawhar lo leh kum 80 tling pha ngei tura tan lak theuh pawh an tum viau a ni.