Arsenal an tlawm ve ta

Inrinni zana English Premier League khelhah St James Park-a lenglut Arsenal chu si khat faiin an tlawm a, season kal mekah a vawi khat nan an chak lo. Newcastle lakah an tlawm vangin Arsenal hi pathumnaah an tlahniam a, Tottenham nen an inkar zau leh zual thei dinhmunah an ding bawk.
St James Park-ah mualneitu Newcas-tle leh Arsenal an inhnehtawk viau a, goal pawh a lut har hle. Kar laihawlah si thum fai ngawta Manchester United sawp a, Carabao Cup quarter-final lut Newcastle United in bul an tan tha a, chawlhlawk hmain goal thun theihna hun tha tum hnih chu uiawm takin an hloh. Chawlhlawk hnu lamah pawh an khel tha chhunzawm viau a, Arsenal tlar-hnung talbuai vangin goal an thun teuh thei hle a, an hlawhtling mai bik lo.
Darkar khat chuang zet goal lut a awm theih loh hnuin minute 54-naah Newcastle in goal an thun ta nge nge. Arsenal tlarhnung talbuai hremin Magpies hian fuh zetin an nawr tlang. Fun taka ball a inpek hnuin Anthony Gordon chuan chiang zetin a pet goal a, hmahruaina goal a thun. Newcastke goal thun danah hian felhlel awm ngeia hriat a nih vangin VAR rawn a ni a, mak tak maiin goal-ah pawm a ni. Newcastle goal pawm a nih vangin Arsenal manager Mikel Arteta a lawm lo hle nghe nghe.
Arsenal hian an si phurh sut ngei tumin tan an khawh a, hu tawp dawn hnaihah na takin nawr mah se goal an thun thei lo tluan a, season kal meka a vawi khat nan tlawm zawkah an tang ta nge nge. Arsenal an tlawm tak vangin EPL season kal mekah Tottenham Hotspurs chauh tlawm nei lova kaltluang awmchhun an ni ta a. London club lian Tottenham hian Thawhlehzana an mikhual Chelsea lakah tlawm an pumpelh leh thei a nih chuan hmahruaitu City lehpelin hma an hruai nawn leh ang.