Mizoram a inthlang dawn 2018-ah vote tla 80.03%

Mizoram chuan vawiin – November 7 hian MLA inthlanpui a hmachhawn dawn a, nimin khan polling party-ten an awmna hmun tur an thleng kim vek tawh. Election hotute chuan 2018 inthlanpuia vote tla za zela 80.03 chu kumin inthlanpuiah hian khum ngei tumin theihtawpin hma an la a ni.Vote hi zing dar 7.00 atangin a thlak theih anga, tlai dar 4.00 thleng hun hawn a ni. Vote thlak tur ten anmahni nihna tichian thei tur document – voter ID, Aadhar, PAN card, driving license leh a dangte keng tura tih an ni.
Final electoral roll-ah mipa 413062 leh hmeichhia 439026 an awm a, service voter 4973 nen, a vaiin vote nei thei mi 857061 an ni. Polling stations 1276 a awm a, heng zinga 525 hi khawpuia chhal ‘urban’ a awm niin, rural-ah 751 a ni.
MLA inthlanpuia a vawikhatna atana vote thlak tur, kum 18 -19 inkar ‘young voter’ 50751 an awm a. Election Commission of India-in vote thlak tura a ngaihpawimawh em em, pianphunga harsatna nei (Persons with Disability) 3381 awmin, polling station-a vote thlak tura kal harsat tawh, ECI-in vote thlak tura a duh si, mahni in atanga vote thlak an dilna pawmsak kum 80 chunglam 8486 an awm.
Tarlan tawh angin, tun MLA inthlanah hian candidate 174 an awm a. Election Commission hriatpui political party zingah MNF, INC leh ZPM chuan bial awm zawng zawng 40 an chuh vek a, BJP-in seat 23 chuhin, AAP-in seat 4 an chuh. Pawl behchhen nei leh nei loa ding independent candidate 27 an awm bawk.
Hetihlai hian vote chhiar hun – December 3 (Pathianni) sawn tura kohhran, tlawmngai pawl leh political party lamin an ngenna chu tun thlengin ECI hian a la chhang lo a ni.
Campaign lai leh campaign theih hun tawp hnu ah, boruak tichhe thei thil liantham thleng leh dan bawhchhia nia hriat complaint an dawn ho zingah pawh thil pawi liantham lutuk a awm lo nia an ngaih thu election hotute chuan an sawi.