Palestinian President-in Gaza-ah inkahhai a awm theih nan US ngen

US hotu lu ber te zing ami Antony Blinken chuan sawi lawkna pawh awm loin Pathianni khan West Bank a tlawh thut a, Palestinian President Mahmoud Abbas chuan zan khuaa Israel te beihna avanga mitthi an pun zel avangin Israel hnenah inkahhai puang turin a lo ngen.
Gaza Strip-a Hamas enkawl Health Ministry thu puangtu sawi danin Israel sipai te chuan zankhuain Maghazi hmuna raltlan awm khawmna chu an bei a mipui pawisawilo 47 an thih thu a sawina a ni.
Health ministry sawi danin Israel sipai ten zankhua-a Gaza an beihnaah chhungkaw pakhat atangin mi 21 lai mai an thih thu sawiin heng mitthi te hi hmeichhia leh naupang te niin Israel-in beihna hrang hrang atanga thi an nih thu a sawi a ni. “Hetiang dan bawhchhiatna hi a rang thei ang bera ti tawp vat turin kan beisei che u a ni,” tiin Abbas chuan Blinken a hrilh a, Israel atanga inkahhaina a rang thei ang bera puang turin a ngen a ni.
“Israel ten indona hmanga an duh duh dana Gaza hmuna Palestinian mipui an nghaisa leh International law pawh zah loa mipui an that vak vak mai hi sawi ngaihna pawh a awm tawh lo a ni,” tiin Abbas chuan Blinken a hrilh niin Palestinian chanchinbu pakhat WAFA chuan a sawi a ni.
Qatar, Saudi Arabia, Egypt, Jordan leh UAE Foreign Ministers te chuan Inrinni khan Amman-ah Blinken hmuin Washington hian Israel chu inkahhai remti vat tura nawr turin an ngen a ni. Mahse he ngenna hi Blinken chuan a hnawl a, inkahhai puan a nih chuan Hamas te hian a hlawkna tel nghalin Israel bei leh turin an intel khawm tha leh thei a ni, tiin a sawi ve thung a ni.
Inkahhai aiah hian United States chuan mihring mamawh inpek tawn hmasak phawt leh chumi hnua Gaza Strip-a mipui tawt lutuk lak atanga inthiarfihlim dan zawn chu thil tul hmasa a nih zawk thu a sawi a ni. “US Secretary of State hian United States duh dan angin mihring dam khawchhuah theih nana thil pawimawh inpek hi a ngai pawimawh em em a, Gaza hmuna mihring tana mamawh hmasa inpekna chhunzawm leh Palestine mite chu tihluihna hmanga dah hran an ni lovang” tiin thu puangtu Matthew Miller chuan a sawi a ni. Israel chuan mipui pawisawilo te hi kan tum ni loin Hamas hel pawl te chiah hi kan tum a ni, tiin an sawi ve bawk.