Siami hoin India kutah Asian Champions Trophy lut

Women’s Asian Champions Trophy final-ah India hmeichhe hockey team chuan 4-0 tehrenga champion lai Japan sawp chungin a tum hnihna atan Asian Champions Trophy title an hlawhchhuak a, Pathianni Ranchi khaw final lianah hian Mizo nula Lalremsiami’n goal khat a thawh nghe nghe.
He inkhel hi stadium chhung eng (floodlights) chiangkuan loh avangin tan hun tura ruat aia minute 50 zetin an tan tlai a; vawihnih champion tawh Japanese nulate kut atangin trophy an chhuhsak ta a ni.
India tan hian Sangita Kumari chuan minute 17-ah goal hmahruai vawlutin, Neha (46th), Laremsiami (57th) leh Vandana Katariya (60th)-te’n goal khat diat diat an thawh ve bawk.
Kum 2016 khan India nulate hian a vawikhatna atan Singapore khawpuiah Asian Champions Trophy title an hlawhchhuak a, kuminah nawn lehin, Japan hi kum 2013 leh 2021 khan an champion ve tawh bawk.
Pathianni vek khan inkhel hmasa lamah Asian Games champion China chuan 2-1-a South Korea hnehin pathumna dinhmun an luah ve bawk.