Thu inchuh mal man tur fak awm lovin inthlang

Mizoram inthlanah hian thupui hlapui a awm thin
a, thu inchuh leh inzawrhsiak te a awm thin. Kumin inthlanpui erawh chutianga thu inchuh han mal man fak tur a awm lo tiin a sawi theih ang.
Rorel lai MNF party hi an hna kal lai chhunzawm turin an inzuar ber tiin a sawi theih a, Congress party hian sakhaw zalenna chungchang an zuar ber tiin a sawi theih ang. ZPM-in kalphung thar an zuar ber tiin a sawi theih bawk ang. Heng hi an inchuh hran lo a, inhnial (debate) nan an hmang lem lo bawk.
Rorel lai MNF party hian nationalism chungchang an sawi thin a, hei pawh hi mipui nawlpui titi-ah a ring vakin a lang chuang lo.
“Party-te hian inzawrhna chu an nei theuh a, chung chu inhnial nana an hman loh bakah an inchuh lo. Hei hian a thawm a tiring lo niin a lang,” chanchinbumi pakhat chuan a ti. Inthlan dangah chuan remna leh muanna chungchang te, thalaite khawvel chungchangte an inchuh a, “change” tih tawngkam te an uar chang a awm. Kuminah erawh chutiang han sawi tur vak a awm lo.
2018 inthlanah khan BJP hmanga inbeihna a nasa a, hei bawk hi kumina party-te thawm rinna pakhat a ni ang.
|um danga thleng ang a thleng miah lo chu a ni lo; tum dang ang bawkin candidate tur inrinsiak hun laiin home minister Lalchamliana a ding dawn em tih thu-ah politics ngaihvente an titi leh a, tum dang ang bawkin Serchhip bialtu Lalduhoma’n inhnialna a chawk chhuak leh bawk.
Lalduhoma hi politics-a a luh tirh atangin politics titi siamtu a tling a, a thil sawi leh tawngkam chungchangah a khat mawi tawkin inhnialna leh titi thar a piang reng tiin a sawi theih ang. Tun tum inthlanah pawh inhnialna leh titi a siam leh a, Mizoram growth rate chungchang a sawi dan, TV lamin an chai a, hei hian inhnialna a chawk chhuak leh.
Campaign boruak a dai a, phai chanchinbumi Mizoram tlawhtute pawhin mak an ti. Inthlan ni pawh a ralmuang a, thil duhawm lo lian tham a thleng lovah ngaih a ni.