Canada-in a rama pem lut tur a ruahmanna ti danglam lo

In luah tur chungchanga buaina leh infrastucture lama harsatna lo sang zel kawnga insiam that a tulzia hre reng chungin Canada chuan ram dang mi an rama lo pem tur kum thum (2024-2026)chhung atan a ruahman chu a ti danglam lo a ni. Canada chuan nakum 2024 ah khian an rama pem leh khawsa nghet tur mi 4.85 lakh vel chu lo dawngsawng thei turin a ruahman a, kum 2025-ah chuan mi 5 lakh vel a beisei a ni. Mi thar cheng nghet tur chu mi 5 lakh ah tawpin kum 2026-ah heti zat tho hi a ruahman a ni. Canada rama pem lutte hi an hnathawh dan a zir zelin category hrang hrangin an then a, an zavaia pem lut te chu-chhungkuaa pem lut te, raltlan te, midang tanpuitu leh categories dang te an ni.
Immigration Levels Plan 2024-2026 hmanni lawka an tlangzarh tak thlirin, Marc Miller, Immigration Minister chuan,”Lo pem thar zat pangai taka kengkawh reng tur chuan in luah tur thar te, mamawh hmasa tur ruahman te leh mihring pun chhoh dan tur te uluk taka ngaihtuah hmasak a tul a ni. Hemi ruahmanna hmang hian Canada ram economy hi rualkhai taka kal tir kan tum a, kan chin dan phunga midangte intanpui tawnna hi kal pui zel kan tum a, France ram atanga rawn pem te lo tanpui te leh kan thawhpui te nena thawhhona tha zawk nei turin ruahmanna kan siam bawk a ni” tiin a sawi a. Quebec hian French tawng hi a ngai pawimawh hmasa ber thin a, Immigration Levels Plan hian kum tin French tawng thiam mi thar leh French tawng hmang thiam Canada-a cheng nghet tur lo tam zel theih dan a zawngin Quebec pawnah chuan kum 2024-ah 6%, 2025-ah 7% leh 2026-ah 8% zela pung turin a ruahman a ni.
Ontario-a awm Talha Mohani, Immigration Law Expert and MD at Migration Bureau Corp.chuan, “Entirnan, kut themthiam tamtak ten Canada rama hnathawh dan kalphung an la hriatloh avangin hna remchang thawh tur an neilo a. Hetiang a nih chuan an thiamna leh an experience te lo sang viau pawh nise hna hnuaihnung zawk leh hlawh hniam zawk pawh an thawh rih mai a ngai a ni. Canada-a lo kal thar ten an hriattur chu tawng an thiam emaw, an qualifications leh experience te chu Canadian market ngaihtuahin a hlu in a pawimawh ber lo thei tih hriat a tha hle a ni” tiin a sawi. Amaherawhchu, Canada chuan ram dang atanga lo pem lut te tan ruahmanna thar siamin hei hi hmanni lawk ah tlangzarh a ni, tiin Mohani chuan a sawi a. He ruahmanna thar : An Immigration System of Canada’s Future hian thil tum pathum a nei a, chungte chu: lo pem thar te thiam taka lo lawm, lo pem thar te leh labour markets mamawh siam rem, hmasawn zelna tura ruahmanna zau zawk leh thawh hona tha neih te an ni.