Vote chhiar hun sawn turin ngen leh MKHC-in tlawmngai pawl kutah dah

Mizoram Kohhran Hruaitute Committee (MKHC) te’n vote chhiar hun sawn an ngen chhunzawm a, hemi chungchangah hian Ningani khan Mizoram Chief Electoral Officer (CEO) Madhup Vyas an hmu.MKHC hian hemi chungchang bawhzuina hi Mizorama tlawmngai pawlte intelkhawmna NGO Coordination Committee kutah an dah nghal a, tlawmngai pawlte hi Ningani tlaiah khan hemi chungchang ngaihtuah hian an thu nghal.
MKHC hruaitute’n CEO an hmuh hian MPF leh political party panga- MNF, Congress party, ZPM, BJP leh AAP te’n vote chhiar hun sawn tura ngenna, chief election commissioner hnena ngenna, CEO kutah hian an dah a, Mizoram CEO hi Zirtawpni-a Delhi-a zin tur niin, lehkha hi a keng dawn a ni.
MKHC chairman Rev Dr C Chawnghmingliana’n The Aizawl Post a hrilh danin, MPF leh party te’n lehkha an thehlut tha leh hi CEO rawtna a ni a, MKHC ngenna chhanna a awm loh avanga CEO hmuh leh an duh thu an sawiin, political party te’n ngenna thehlut ve leh se tiin a lo rawt a, MKHC lamin MPF hi Election Commission of India-in an lo hmelhriat tawh bawk a, MPF pawhin thehlut ve leh se tiin an rawt belh bawk.
MKHC hian October ni 11 khan vote chhiar hun sawn turin an lo ngen tawh a, Mizoram Synod, MPF leh political party te’n an thehlut zui bawk. Election Commission lam atanga thawm a awm loh avangin November ni 3 khan MKHC-in an thehlut leh a, darkar 24 an nghah tur thu an sawi chungin vawiin thlengin chhanna a la awm lo. Chumi hnuah CEO an hmu leh ta a ni.
Rev Dr C Chawng-hmingliana chuan chhanna an la beisei reng tih a sawi a, amaherawhchu, a bawhzuina lam hi NGO Coordination Committee kutah an dah thu leh anni lam pawh an lo tlawmngaih theih thu te a sawi.