Chelsea in Manchester City an chelh

November 12, Pathianni zan khan English Premier League-ah inkhel hmuhnawm zet mai a awm a. Goal riat zet luhna inkhelah mualneitu Chelsea leh Manchester City te 4-4 in an inhnehtawk. Pathianni zana inkhel dangah Liverpool in hnehna an chang a, Arsenal lehpelin, pahnihnaah an inhlangkai ve bawk.
Chelsea 4-4 Manchester City
Thlasik bazar leh Nipui bazarah sum tam tak seng chunga che tha hleithei lo, season tharah pawh besei phak lo taka inlan Chelsea an insiamtha a, tlawm nei lova kal tluang mek Tottenham an hneh hnu lawkah hmahruaitu Manchester City an inhnehtawkpui leh nghal thei a. An sum sen a thlawn dawn lo niin a lang tang.
Stamford Bridge a lenglut Manchester City in bul an tan tha a, goal thun hmasa zawkah tum thum ngawt an tang a, an tlarhma player te chetthat zanah an tlar hnungte an chetha tawk lova, an hmahruaina an humhim zo lo vek thung. City hian Chelsea defender Marc Cucurella-a’n box chhunga Erling Haaland a pawh tluk vangin penalty an hmu a. He penalty hi Haaland chuan awlsam takin a pet goal a, minute 25-naah hmahruaina goal a thun.
An mualah goal an chhuah hnuin Chelsea an insiamtha thuai a, an si phurh an sut thuai. Goal an chhuah atanga minute li hnu lekah David Silva chuan Conor Gallagher corner pet chu awlsam takin a tauh goal a, an si phurh a sut. Inhnaihchilh taka goal an thun ve ve hian game a titang leh zual a, inkhel hmuhnawm an pho lang zui nghal bawk.
1-1 a nih hnuin Chelsea an khel tha chhunzawm a, goal thun hmasa zawkah an tang ve ta thung. Minute 37-naah City defender Josko Gvardiol chet-sual vangin Chelsea in goal an thun. Reece James cross tha tak chu City forward hlui Raheem Sterling chuan awlsam takin a pet goal a, a team hlui laka an si phurh a sut. Sterling goal hmang hian chawlhlawk thleng hma an hruai thei tura ngaih a nih laiin an hmahruaina an humhim zo bik lo. Minute 45+1-ah box chhungah tibuaitu nei lova an thlah zalen Manuel Akanji chuan awlsam takin a tauh goal a, an si phurh a sut a, 2-2 a inhnehtawk chungin chawlhlawk an hmang zui ta a ni.
Chawlhlawk hnu lamah inkhel a hmuhnawm vui viau a, goal li dang hmuh tur a awm belh leh. Second half tan hnu rei loteah City in goal an thun leh nghal a, Julian Alvarez corss tha zet mai chu Erling Haaland chuan vanneihthlak ang reng takin a hnawl lut a, hma an hruai nawn lehna goal a thun. Darkar khat tlin hmaa goal hnih a thun hman vangin Haaland hian hattrick a siam theih hmel hle a, EPL-a a goal 50-na thun ngei tura ngaih a ni hman.
Goal chhuah nawn leh mah se Chelsea an buai phah chuang lova, Tottenham an hmachhawn tum ang maiin an khel tha mar hle. An si phurh sut ngei tumin tan an khawh a, an hlawhtling leh thuai. Minute 67-naah Conor Gallagher pet pawh zet mai chu City si nghak Ederson-a’n lo dang hman bawk mah se Nicolas Jackson a pet nawn leh chu dan rual a ni tawh lova, Chelsea in an si phurh an sut. Chelsea in nipui bazar inhawn laia an lak luh Nicolas Jackson hian EPL a khelh hnuhnung pahnihah goal li a thun a, a chetha sawt hle a, Chelsea chakna hnar pawimawh tak a nih chho thuai dawn niin a lang.
Goal thum ve ve an thun hnuin inkhel a hmuh-nawm zui viau a, goal thun tura an innawr tawn a hmuhnawm thei hle. Hun tawp dawn ruaiah chak tura rinkai zawk City in goal an thun leh ta nge nge. Minute 86-naah Rodri pet kawh tak chu Chelsea defender David Silva chuan an lamah chiang zetin a dang goal a, City in hma an hruai nawn leh. Hun tawp dawn ruaiah goal an thun nawn leh vangin City hian hnehna an chang nge nge dawn nia ngaihna lian tak a awm hman.
An mualah an tlawm mai dawna a lan laiin Chelsea in goal thun theihna hun tha an nei ve leh. Hun pek belh minute 90+4-ah City defender Ruben Dias chuan box chhungah chiang zetin Armando Broja a titlu a, penalty a chawi. He penalty hi City player hlui Cole Palmer chuan chiang zetin a pet goal a, an si phurh a sut. City youh team tana khel thin Palmer hian a team hlui lakah zahna a lantir nan a goal thun hi a lawm duh lo. Chelsea forward ni ta Palmer leh City goal thun khawl Haaland ten inngainatna thuk tak an nei tih an chetziain an lantir a, hei hian football mawina leh zahawmna a pho lang
Goal thum ve ve an thun hnuin goal dang a luh belh thei tawh lova, inkhel hmuhnawm tak chu 4-4 in a tawp ta a ni.
Pahnihnaah Liverpool
Pathianni zana inkhel dangah Liverpool chuan Anfield-a an mikhuan Brentford chu si thum faiin an hneh a, pahnihnaah an inhlangkai.
Liverpool tan hian Mohamed Salah chuan minute 39-naah hmahruaina goal a thun a. Aigupta tlangval hian minute 62-naah an goal hnihna a thun zui leh bawk a, an goal thumna hi minute 74-naa Diogo Jota thun a ni ve thung. Liverpool tana goal hnih thun Salah hian English club tan goal 200 a thun tling ta chiah a. He goal 200 te hi Liverpool tana goal 198 a thun leh Chelsea tana goal hnih a thunte an ni. Salah hian season kal mekah an muala an khelh vawi rukah goal ruk a thun tling tawh a. Reds player zingah hetiang ti thei awmchhun a ni bawk.