Taylor Swift ‘Cruel Summer’ a Hot thar leh

On Nov 15, 2023 18 0

Taylor Swift ‘Cruel Summer’ chu Billboard Hot 100 (singles) chart-ah a No.1 a, he chart-a a zawn ni kher lo va kar thum a No.1-na a ni ta a, Jung Kook pawh No.5 kaiin, The Beatles pawh kum 1996 hnua a vawi khat nan chart top 10-ah an lang a, he chart top 10-a lang thei hla 35 an nei tling ta a ni.
Billboard Hot 100 (singles) chart hi kar khat chhunga US-a hla lar dan tehna niin, chart ranking siam nan all-genre US streaming (official audio leh official video), radio airplay leh sales data te chu tehna pawimawh a ni.
Kar thum liamta khan ‘Cruel Summer’ chu Hot 100 chart-ah a rawn No.1 a, kar hnih a No.1 hnuah kar kalta chart-ah khan Swift hla dang “Is It Over Now? (Taylor’s Version) [From the Vault]” a rawn No.1 a, ‘Cruel Summer’ kal tluang lai a rawn tichat a, tunah ‘Cruel Summer’ bawk a No.1 leh ta a ni. Heti hian Taylor Swift hi zaithiam zingah mahni hla he chart-a No.1 ni lai an hla danga luahlan a, No.1 hmasa zawk No.1-ah bawk kaipui leh thei pahnihna a ni. Hetiang tithei dang chu BTS niin, anni hian an hla ‘Butter’ chu kar sarih an No.1 pui hnuah a kar riatnaah an hla dang ‘Permission to Dance’ an No.1 pui leh a, a karlehah ‘Butter’ bawk No.1 an kaipui leh a ni.
Cruel Summer hian radio airplay-ah ngaithlatu maktaduai 77.8 a la nei thei a, stream maktaduai 13.8 leh sales 4,000 a la tling bawk a, hei hi chart-ah a rawn No.1 pui leh ta a ni. ‘Cruel Summer’ hi 2019-a Swift album ‘Lover’ atanga a single a ni a, kumina The Eras Tour a neihah a rawn sa lar thar leh ta a ni.
Chart No.1 hlui Doja Cat ‘Paint the Town Red’ chu No.4 atangin No.2 a kai thar leh a, Taylor Swift ‘Is It Over Now? (Taylor’s Version) [From the Vault]’ chu No.1 atangin No.3-ah a tawlh ve thung a, SZA ‘Snooze’ chu No.8 atangin No.4 a kai thar ve leh ta bawk.
Jung Kook hla thar ‘Standing Next to You’ chu stream maktaduai 10.6, radio airplay 4,00,000 leh sales 90,000 tlingin No.5-ah a debut. He hla hi a debut solo album ‘Golden’ atanga a single a ni a, a album pawh hi Billboard 200 (albums) chart-ah No.2 a ni mek bawk. Jung Kook hian Hot 100 chart top 10-a lang thei hla pathum a nei tling ta a, a hla dang ‘Seven’ featuring Latto chu No.1 kaiin, Jack Harlow nena an thawhdunna ‘3D’ chu No. 5 a lo kai tawh bawk. Chart No.1 hlui, top 10 atanga chhuak tawh Zach Bryan ‘I Remember Everything’ featuring Kacey Musgraves chu No.11 atangin No.6-ah a invawrh thar leh ta bawk.
The Beatles ‘Now and Then’ chu stream maktaduai 11, radio airplay maktaduai 2.1 leh sales 73,000 tlingin No.7-ah a debut a, Beatles hla he chart top 10-a lang thei 35-na niin, 1996 hnuah chart top 10-a an lan lehna hmasa ber a ni.
Chart top 10 khartu hla pathum chu country hla vek niin, chart No.2 pawh lo ni tawh Luke Combs ‘Fast Car’ chu No.13 atangin No.8 a kai thar leh a, chart No.7 lo ni tawh Morgan Wallen ‘Thinkin’ Bout Me’ chu No.17 atangin No.9 a kai thar leh a, a hla dang, he chart-a kar 16 No.1 ni thei ‘Last Night’ chu No.15 atangin No.10 a kai thar leh ta bawk.