ATP Finals champion Djokovic

Pathianni zan khan ATP Finals khelh a ni a, inkhel hmuhnawm takah champion lai Novak Djokovic chuan tualchhung tlangval Jannik Sinner a hneh a, a vawi sarih nan a champion.
Final-a inhmchhawn World No. 1 Novak Djokovic leh No. 4 Jannik Sinner te hi Green Group-ah awm tlangin an lo inhmachhawn tawh a. Inkhel hmuhnawm zet maiah inelna neih meka khel tha tluang tak Sinner chak zawkah a tang. Green Group-ah Sinner hian a khingpui Stefanos Tsitsipas, Novak Djokovic leh Holger Rune te a hneh vek. Group match hnuhnung berah Rune a hneh vangin champion lai Djokovic-a’n semi-final a luh theih phah. Semi-final-ah an chak ve ve hnuin final-ah an inhmachhawn zui leh ta a ni.
Thil thleng thlen nawntir duh lova, khingpui pangngai laka tlawm nawn duh ngai lo Djokovic-a’n champion nawn leh ngei tumin tan a khawh a, final boruak sangah nghet taka inlan in, champion phuin a inlan. Set khatna tir lamah inhnehtawk takin game inlak chhawk mah se Serb hian break pawimawh tak a nei a, harsa lutuk lo vin set hmasa a la.
Set khatna a lak hnuin Nole hi inringtawk lehzualin a inlan a, set hnihnaah inkhel hmuhnawm tak an lantir. Set hnihna tir lamah Djokovic-a’n break a nei leh a, champion turin dinhmun tha a luah. Djokovic-a’n 4-2 a hma a hruai laiin a break nawn leh teuh hle a, deuce vawi riat ngawt an neih hnuin Sinner-a’n game a la hram. Break nei nawn thei lo mah se Djokovic-a’n a serve a hum thei hram zel a, game thum hloh chungin set a la nawn leh a, 6-3, 6-3 a hnehna changin ropui takin a champion a. ATP Finals-a champion ngun ber record thar a siam nghal bawk.
Kum khatna chetha zual mi pariatte inelna ATP Finals-ah hian champion ngun ber chu vawi ruk champion Roger Federer a ni thin a. Kum 2022-ah a champion vangin Novak Djokovic hian Federer record a nih rual. 2023-ah ropui taka champion zawn leh tak vangin Djokovic hian Tennis chawlhsan tawh Federer record a khum a, ATP Finals-a champion ngun ber a ni ta a ni.
A vawi sarih nan ATP Finals-ah champion turin Djokovic hian fiahna hautak tak a paltlang a, rawlthar tha ber ber pathum a hneh vek. Green Group-a a khelh hmasak berah Holger Rune a hneh a, Rune a hneh vangin World No. 1 ni chunga kum khar tura a mamawh point a hmu nghal. Harsa taka semi-final a luh hnuin semi-final-ah tunlaia tha ber zinga mi Carlos Alcaraz a hmachhawn a, Wimbledon final-a a hneh loh Alcaraz hi a sawp a, awlsam takin final a lut. Final-ah group stage-a a hneh loh Jannik Sinner hmachhawn nawn in, fiahna hautak a hma-chhawn a, set hloh lova hnehna chang lehin a champion. Inelna hma-chhawn zinga upa ber ni bawk mah se rawlthar tha ber ber te pawhin an la hneh thei chuang lova, Turin-ah Djokovic ropuizia a lang nawn leh.
Covid 19 hri danna a lak loh vanga hun thim leh harsa takin a tlakbuak Djo-kovic tan kum 2023 hi kum tha leh chhin-chhiahtlak a ni. Grand Slam pali-ah final a lut vek a, Wimbledon-ah champion zo lo mah se, Australian Open, French Open leh US Open-ah te a champion. French Open-ah a champion vangin Tennis-a mipa player zingah Grand Slam pali-ah vawi thum chin champion vek thei hmasa ber a ni a. Mipa lamah Grand Slam-a champion ngun ber a nih thar bakah mipa leh hmeichhe zingah Grand Slam-a champion tam ber Margaret Court-i record a tluk a, Grand Slam-ah vawi 24 a champion tling bawk.
Kum 2023 hi mipa lamah Grand Slam-a champion tam ber a nih kum a ni a, Tennis player zawng zawng zingah Grand Slam final khel ngun ber, World No. 1 ni chunga chawlhkar hmang tam ber, World No. 1 ni chunga kum khar ngun ber leh ATP Finals champion tam ber a nih kum a ni a. Paris Masters a champion ngun ber a nihna a tihzau belh bakah ATP Master title la tam ber a nihna a tihzau belh bawk.
ATP Finals-ah ropui taka a champion hnuin Djokovic hi ram tan a inlan zui leh nghal dawn a, tunkar ningani zan hian Davis Cup Finals – quarter-final-a Great Britain an hmachhawn turah Serbia tan a inlan ang a, an ram hi inelna lianah champion pui tumin tan a khawh zui ang.
Final-ah uiawm taka chak zo ta lo Jannik Sinner kha Italian zingah ATP Finals khel thei awmchhun a ni a. Italian zingah ATP Finals a champion hmasa ber nih a tumna erawh chu player ropui Jokovic lakah a puitlin zo ta lo thung.