Mizoramah sangha dil Sqkm 55.7-a zau awm Hectare khatah sangha Kg 827 vel thar chhuak

Mizoramah sangha dil 16,587 a awm mek a, sangha dil zawng zawng belhkhawm zau zawng hi Hectare 5527.08 a ni a, chu chu a kilometre zawng chuan Sqkm 55.27-a zau a ni.
Hei hi Economics & Statistics department-in an tihchhuah thar ber Statistical Handbook 2022-in a tarlan dan a ni a; kum 2021-22 chhunga record a ni. Kum 2022-ah hian a hma kum aia sangha dil punna chu 101 a ni a; hei hi hectare 20-a zau a ni.
Sangha dil, a dung km 55, a vang km 55-a zauah hian kum khat chhunga sangha tharchhuah zat chu, 2021 khan Tonnes 4304.69 niin, 2022-ah Tonnes 4575.05 a ni. Chumi awmzia chu 2021 khan kum khata sangha tharchhuah zat chu hectare khat zelah 0.781 tonne leh, kum 2022-ah hectare khat zelah 0.827 tonne a tharchhuak tihna a ni.
India ram puma sangha dil atanga sangha tharchhuah dan national average hi 3-6 tonnes a ni tlangpui a. National average-ah hectare khata sangha Kg 3000-6000 vel tharchhuah theih a nih laiin, Mizorama sangha dilah chuan hectare khatah sangha Kg 827 vel tharchhuak ang a ni.
Mizoramah hian tun dinhmunah sangha chi siamchhuahna (Hatcheries) 9 a awm mek a, heta tang hian kum 2021-22 chhung khan sangha chi nuai 125.95 siam chhuah a ni. Hetih lai hian, Mizorama sangha dil siamtute sangha chi mamawh zat chu nuai 442.17 a ni a, chumi awmzia chu state pawn atangin sangha chi nuai 316.22 lakluh a ngai tihna a ni.