Kum 2022 khan cancer natna vei hmuh thar, Cancer Hospital Zemabawka inziaklut mi 1465 an awm.
-- Advertisement --
February 3 khan khawvel hmundang rualin Aizawlah World Cancer Day 2023 hman a ni a. He Ni hi khawvel pumah kum 2000 atang khan hman tan a ni a. Mizoramah erawh kum 2014 atanga hman a ni. National Programme for Prevention & Control of Cancer, Diabetes, Cardiovascular Diseases & Stroke (NPCDCS) chuan Mizoramah ‘population based screening’ a kalpui mek a. Mizoram State Cancer Institute chhinchhiah danin, kum 2022 chhung khan Cancer Hospital Zemabawka cancer natna vei in-register mipa 752 leh hmeichhia 713, an vaiin 1465 an ni.
World Cancer Day hmanpuitu National Health Mission mission director Dr Eric Zomawia chuan India ramah Mizoram chuan cancer vei tam lamah pakhatna a hauh hnem hle a, hei hi ngaihmawhawm tak a nih avang leh cancer hi inven theih thil a nih avangin, uar lehzuala zirtirna inpek a hun hle tih a sawi. Chhul cancer thlentu – Human Papiloma Virus laka invenna pawh hun reiloteah kum 9-14 inkarah pek tan a nih tur thu a sawi bawk.
Kumin thupui “Close the Care Gap” tih hmangin MSCI Department of Radiation Oncology head Dr B Zothankima’n zirtirna a pe a. Cancer laka inven, natna hmuhchhuah ran, enkawlna tha zawk leh chhawmdawlna tha lehzual pek chu thupui tum ber a ni tih a sawi.
MSCI director Dr Jeremy L Pautu chuan bul tantirh lai ngaihtuah chuan Mizoramin cancer enkawl kawngah hma a sawn nasa tawh hle, tiin, a ni tela cancer case thar a pun chhoh zel avangin MSCI pawh thuam changtlun chhoh zel a ni tih a sawi.