Sangha eiin stroke risk tihniam thei

Mithiam ten zirchianna an neih tharah kar khatah sangha tlem tal ei ziah te chuan a ei ve ngai lo te aiin thluaka thisenzam chat/block (stroke) neih theihna risk an nei hniam zawk niin an sawi.
Sangha-ah hian omega-3 fatty acid a awm a, chu chu BP sang leh cholesterol tan a tha hle a, hei vang hian stroke risk pawh a tihniam thei niin zirchiannaa an hotu Susanna Larsson leh Nicola Orsini, Karolinska Institutet, Sweden a mi te chuan an sawi.
Mithiam te hian United States, Europe, Japan leh China a mithiam ten zirchianna an lo neih tawh chi hrang hrang 15 vel behchhanin zirchianna thar hi an kalpui a. Zirchiannaah hian miin sangha an ei nasat te zawh chhuah an ni a, kum 4 atanga kum 30 chhung an hriselna enzui a ni a, tuten nge stroke nei tih te an chhui zui leh a ni.
Harvard School of Public Health-a epidemilogst Darius Mozaffarian chuan, “Kar khatah chaw hmeh pui bera sangha vawi thum atanga vawi li vel hmeh hian sangha thatna hi kan taksaah a lang pha anga a ngaih a ni,” a ti ve bawk.
Sangha-ah hian Vitamin D, selenium leh protein dangte pawh a awm a, chungte pawh chu stroke risk tihniamtu ni theiin an hre bawk a ni.
Zirchianna hi mi chi hrang hrang, kum 30 leh 103 inkar, mi 4,00,000 vel-ah neih a ni a, chung zinga mi 9,400 te chuan stroke an nei a ni. He zirchianna atanga an thutlukna chu, kar khata chawhmeh pui bera sangha vawi thum atanga vawi li vel hmeh hian stroke risk hi 6% in a tihniam thei, tih a ni.
The Amercian Heart Association pawhin kartin sangha tum hnih tal chawhmeh pui bera hman hi a recommend nghe nghe a ni.
He zirchianna chungchang hi journal Stroke-ah tihchhuah a ni.