Kolkata-ah Zopa lemziak phochhuak

Aizawl Art Gallery neitu Laltanpuia chuan Kolkata-ah a lemziak a phochhuak mek.
A vawi 11-na atan ama kutchhuak pho chhuahna solo painting exhibition hi Laltanpuia hian Kolkata-ah a buatsaih a, November 26 tlai dar 5 khan art critic hriat hlawh Prasanta Daw chuan a Academy of Fine Arts-a Art Center-ah a duh apiang en leh lei theih turin a hawng a ni.
India rama hnam chi hrang hrang chengte hian mahni hmun theuhah art kalpui dan kan nei vek a, mi huaisente kutchhuak atangin kan hmuh ngai loh art work tha tak tak a lo piang zel a, hei hian inpawhna tha, inpumkhatna min siamsak a, India ram hi art-a a hausak zia leh a ropui zia a lantir thin, tiin Prasanta Daw hian a sawi.Indian art history sawi rikin Mizo hming sawilan tur awm rih lo mah se, Indian art history chu Mizote ta a ni ve tho tih a sawi a. “Vawiina lemziak phochhuahte atang hian Mizo artist-ten theihna an neih san zia ka hmu a, Indian art kan sawiin Mizote hming kan lamtel a tul hun a thleng thuaiin ka ring,” a ti.
Lemziak phochhuaktu Laltanpuia chuan West Bengal art history sulhnu ropui tak nei tawhah ‘solo show’ a nei thei chu lawmawm a tih thu a sawi a. Mizo artist-te chu Indian artist-te zinga hlawhtling ber ber an nih theih nan hma an lak zel tur thu te, India ram khawpui hrang hranga art gallery chhuanawm tak takah inlan zel an tum thu te, bul tanna chu a tawp nan hman an tum loh thu te, Mizo artist-ten tun aia chak zawka hma an sawn theih nan thawhhona kawng zau tak hawn a ni ta chu lawmawm a tih thu te a sawi a ni.
Exhibition-ah hian watercolour hmanga lemziak 30 pho chhuah a ni a. December 2 thleng a awh dawn. Mizoram I&PR department chuan exhibition fund a neih atangin Laltanpuia 11th Solo Painting Exhibition hi a pui dawn a ni.