India-in ‘extreme weather events’ tawng zing

India chuan kumin thla kaw chhung khan ni tin deuhthaw extreme weather events a tawng a, nuna chan 3,000 dawn an awm bawk tiin report tihchhuah chuan a tarlang.
Independent think tank Centre for Science and Environment (CSE) report chuan climate-vulnerable ram te chuan January atanga September 2023 chhungin extreme weather 86 per cent vel an tawng a ti bawk a.
CSE chuan nunna chan 2,923 an awm tiin, thlai million hectares hnih vel dawn a chhe bawk a, chenna In 80,000 chuang a t chhia a, ran 92,000 in nunna an chan a ti bawk a. He ai hian a number sang zawk thei niin hei hi chu data an lakkhawm chin chauh a ni an ti bawk.
‘India 2023: An assessment of extreme weather events’ chuan finfiahna an neih te hmangin extreme weather events zin dan a zirchiang a ni. He assessment hian chiang takin India in kum 2023 a a thil tawn chu khawvel lum zelah ‘pangngai lo tak’ a tawng tih a lang a ni” tiin CSE director general Sunita Narain chuan a sawi.
Madhya Pradesh chuan extreme weather events tawng hnem berin 138 lai a tawng a. Mahse, nunna chan tam berna chu Bihar-ah niin 642 an awm a, Himachal Pradesh-in dawtin 365 an awm a, Uttar Pradesh-ah nunna chan 341 an awm bawk.
Punjab-ah ran thi tam ber thungin Himachal Pradesh chu extreme weather events avanga chenna in chhiat hnemna ber a ni thung.
Chhim lam region-ah Kerala chu extreme weather ni ngah ber niin 67 lai a nei a, nunna chan 60 an awm bawk a. Telangana chu thlai chin chan hnem ber niin 62,000 hectares vel a chan a, ran thi 645 a nei bawk a. Karnataka chu thil tihchhiat nasatna ber niin chenna in 11,000 chuang tihchhiatin a awm bawk.
Hmar thlang lamah Uttar Pradesh chuan extreme weather ni ngah berin 113 a nei a, Himachal Pradesh, Punjab, Haryana, Uttarakhand leh Rajasthan pawh a khawih tel bawk.
Khawchhak leh hmarchhak lamah Assam chuan extreme weather event ngah berin 102 a nei a, ran vulh 159 chanin thlai chinna 48,000 hectares tihchhiatin a awm a. Nagaland chu chenna in chhiat tamna ber niin 1,900 a chhe thung.
CSE chuan kumin January kha average aia lum an ti a, February chuan record khumin kum 122 chhunga a lum ber a ni a.
|ek tla leh thlipui chu chhiatna thlentu langsar ber niin ni 237 ah tum 176 thlengin nunna chan 711 an awm phah bawk a. Henga nunna chan tam berna chu Bihar a ni thung a. Mahse, chhiatna leh hloh thlen nasa ber chu ruahsur nasa, tuilian leh leimin niin heng avanga nunna chan 1,900 vel an awm a ni.