Mizoram leh khualzinmite
Mizoram tourism statistic thar berah chuan kum 2021-22 chhungin Mizoramin khualzin 1,32,099 a thleng a, chutih laiin khualzinte lo dawngsawnga lo chiauautu ber tura ngaih tour operator awm lo angin report a ni a, 2020-21 chhung pawh khan tour operator hi an awm lo anga report a ni bawk.
Tour operator leh travel agency-te pawimawhzia chu sawi tam ngai lova tlang hriat a ni a, khualzinte tana tour package te lo chhawpchhuahsaktu an ni a, tourism industry-a a kelki pawimawh tak an ni.
Tuna statistic kan hmuh ang hi chuan khualzinte hi chiauautu awm mumal lovin an awm dawn tihna a ni a, khualzinte hip lut tam tura phuahchawp Kut hial siam a nih laia khualzin nuai chuang lo buaipuitu an awm mumal lo hi chu thil inhmeh lo tak a ni.
Khualzin nuai 1.3 lo dawngsawng tur hian kan hotel neih mek hian a dawl zo meuh em tih hi ngaihtuah tham a ni awm e. Tuna khualzin kan neih dan atanga chhut chuan, chawhrualin chatlak miah ni tin mi 360 chuang an lo lut reng tihna a ni a. Khualzin na na na chu zanhnih khat lek riah thu a awm lova, zan nga vel tal cham tura chhut chhinin, kan hotel leh tourist lodge-te hian an accomodate zo lo hle tih a lang thei a. Chinchang hre deuhvin an sawi danin Aizawla hotel awm zawng zawnga room hi 2000 pawh a tling lo turah an sawi a. Chuti a nih chuan, chatlak lova ni tin khualzin 360 vel lo dawngsawng tur chuan a ngaihna a awm lo hle tihna a ni.
Khualzin zat record lamah hian thahnem ngaih luatah a nambar hi kan duhthawh ta mai em ni a tih theih rum rum awm e.
International Tourism Mart kan thlen tum khan, hotel tihtlak ve deuh china ngaih kha a tlem pharh mai a, eng emaw international event liantham ve deuha lo telte lo mikhual thei tura kan lo inpuahchah ve sauh sauh a tul tawh hle a ni.
Himachal Pradesh-ah khuan Shimla khu khualzin hiptu lian ber a ni a, mihring nuai hnih vel an awm a, Aizawl aiin a khawthleng a te zawk a, mihring pawh an tlem zawk bawk. Khuti chung khuan hotel 900 chuang a awm a. Mikhual hip turin tan an la a, an hip a, a dawhthleng lamah pawh an inbuatsaih tha; entawntlak an ni. Tourism industry hi economy chawikanna hmanraw tha ber a ni a, he lamah hian kan inthlurbing thiam a pawimawh khawp ang le.