Arsenal an tlang, United la chiang lo

November 29, Thawhleh zan khan UEFA Champions League2023-24 khelh chhunzawm niin, Arsenal chuan an mikhual Lens chu si ruk faiin an sawp. Nuamsa taka Arsenal an chak laiin Manchester United erawh chu Galatasaray lakah an chak zo lo va, tla thei dinhmunah an la ding. United hian last 16 lut turin team lian Bayern Munich an hneh ngei ngei a ngai dawn.
Arsenal an tlang
Group B-a hmahruaitu Arsenal chuan an group ah pathumna awm mek, Mimuala an hneh loh rik ngawt tawh Lens chu Emirates Stadium-ah an mikhual a. France a an tlawm tawhna chhangletin an mualah si ruk fai ngawtin an chak a, last 16 an luh bakah Group champion an ni chiang nghal bawk.
Premier League hmahruaitu Arsenal hian an mualah an khel tha viau a, an mikhual Lens lakah hian chawlhlawk hmain goal nga ngawt an thun hman a, chawlhlawk hnu lamah goal khat an thun belh leh bawk a, an mualah an chak chiang hle. Gunners tan hian inkhel tan atanga minute 13-na lekah Gabriel Jesus siamsak atangin Kai Havertz chuan hnaite atangin hmahruaina goal a thun. Arsenal in Chelsea atanga an lak Havertz hian club leh ram tan a khelh hnuhnung vawi thumah goal a thun vek a, a chetha chho hle. Pathianni zan khan Brentford lakah Gunners hi a lo chakpui tawh bawk a nih kha.
Hmahruaina goal an thun hnuin Arsenal an khel tha chhunzawm a, goal an thun belh leh thuai. Minute 21-naah Gabriel Jesus chuan box chhunga ball a chan chu inringtawk takin a khalh kual a, lei hrulah fuh zetin a pet goal a, an goal hnihna a thun. Hma takah goal an thun zawn vangin Gunners an phur viau a, laipui a puak nawn leh thuai. Jesus goal thun atanga minute hnih hnu lekah Bukayo Saka chuan vanneih-thlak ang reng takin a pet goal a, an goal thumna a thun zui leh.
Minute 21 chhung leka goal thum an thun hman vangin chak zawk tur a chiang tan viau a, Gunners hian goal engzat tak thun belh ang maw tih chu inkhel entute zawhna a ni chauh tawh. Saka goal thun hnu lawkah laipui a puak nawn leh zat a, minute 27-na lekah Gabriel Martinelli chuan mawi leh class zet maiin a pet lut a, an goal lina a thun. Darkar chanve em pawh an khelh tlin hmaa goal li ngawt an thun hnuin Arsenal in an duhtawk mai lova, chawlhlawk hmain goal khat an thun belh leh hman. Chawlhlawk dawn hnaih minute 45+1-ah captain Martin Ødegaard chuan Tomiyasu siamsak tha tak chu lei hrulah fuh zetin a hlap lut a, si nga fai ngawta hmahruai chungin chawlhlawk an hmang.
Chawlhlawk hnu lamah Arsenal an khel tha chhunzawm a, goal thun belh teuh tum mah se goal khat bak an thun belh thei lo. Lens in an mualpho lutuk tur thup mawi nan goal khat tal thun tumin tan khawh bawk mah se goal an thun thei lo tluan ve bawk. Si nga faia hma-hruai tawh Gunners hian goal dang an thun belh tawh dawn lo emaw tih hnu minute 86-naah penalty an hmu. Penalty hi Jorginho chuan inring-tawk takin a pet goal a, an goal rukna a thun. Jorginho goal thun hnu hian goal dang a luh belh thei tawh lova, siruk faia hnehna chang Arsenal chu group champion an ni zui ta a ni.
United an chak zo lo
EPL team lian Manchester United chu an la chak ngai lohna Rams Global Stadium-ah an lenglut a, nidang ang bawkin an chak zo lo leh pek. Galatasaray nen 3-3 a inhnehtawk a, an hma-hruaina an humhim zawh loh vangin United dinhmun a chhe viau tawh a, Group A mawngphahah an awm mek. Group mawngphahah awm mek mah se United hian tlang theihna hun tha an la nei a, tlang turin Bayern Munich an hneh ngei ngei a ngai tawh.
United hian an lenluhna Rams Global Stadium-ah an khel chhe hran lo a, minute 18 chhung lekin goal hnih an thun hman. Inkhel tan atanga minute 8-na lekah tunlaia lar tak Alejandro Garnacho chuan hmahruaina goal a thun a. Minute 18-na lekah Bruno Fernandes chuan an goal hnihna a thun zui leh bawk. Hma taka goal hnih an thun vangin an la chak ngai lohna mualah United an chak ve dawn ta niin a lang hman a, United an phur hle.
Si hnih an phurh hnuin Galatasaray an insiam tha a, minute 26-naah Hakim Ziyech chuan goal thunin an si phurh a sut. An si phurh sut bawk mah se minute 55-naah Scott McTominay goal thun hmangin Turkey club hi si hnihin an hnufual nawn leh. An mualah tlawm pumpelh ngei tumin tan an khawh chiam a, an hlawhtling. Minute 62-naah Hakim Ziyech chuan an si phurh a sut then a. Minute 71-naah si nghak Andre Onana chetsual vangin Kerem Aktürkoglu chuan an si phurh a sut zo ta nge nge a ni.