Hmarchhak MP-te Japan-ah

Kumin November 25 atang khan kar khat thangin India hmarchhak atanga Member of Parliament mi 5 chuan Japan an fang a, Mizoram Lok Sabha member C Lalrosanga pawh a tel.
Hmarchhak MP-te hian Japan rama mi pawimawhte hmukualin India leh Japan thawhdunna leh inkungkaihna huamzau zawk leh nghet zawka siam dan tur an sawipui a. Japan MP-te nen pawh inkawmin, C Lalrosanga chuan Japan ramah Mizo thalaite tan eizawnna kawng hrang hrang a inhawn theih thu te, Japan company-te tan Mizoram leh hmarchhak state dangah hmasawnna hna thawh tur hrang hrang a awm thu te a sawi.
Japan State Minister for Foreign Affairs Hori Iwao chu Zirtawpni khan an hmu a. India leh Japan thawhdunna an sawipui. Japan minister hian India nena thawhdunna huamzau tir zel an duh thu a sawi a. A bikin India hmarchhak ramte nen kawng hrang hrangah chak zawkin thawh ho theih a nih thu hmarchhak MP-te hi a lo hrilh a ni.
Zirtawpni zan khan India MP-te hian Japan media lamte leh khawtlang mi pawimawhte Tokyo ah an kawm a, vawiin – Inrinni hian Tokyo chhuahsanin India pan an tum a ni.
Ningania mi pawimawh an hmuh zingah Japan Economy, Trade and Industry minister Nishimura Yasutoshi leh Japan Prime minister hlui Yashihide Suga te an tel a. India hmarchhak state-te leh Japan thawhdunna zau zawk neih dan tur an sawipui a ni.