Saitual leh Khawzawlah AIDS Day

World AIDS Day 2023 pualin Zirtawpni khan Mizoram hmun hrang hrangah hun hman a ni.
Khawzawlah chuan Khawzawl Vengthar Chhipchhuan Bazar Waiting Shed-ah District AIDS Prevention and Control Committee bultumin HIV/AIDS chungchang inhrilhhriatna atan hman a ni a. Addl. DC Lalfakzuala’n hmanpuiin, kumin World AIDS Day thupuiah ‘Let Communities Lead’ tih hman a nih angin, HIV/AIDS do turin chhungkua atanga bul tan a pawimawh tih a sawi. Mizoramah sawrkar tiatin NGO a lian a, kohhran leh association pawh kan thahnem a, kohhran leh NGO-te pawhin HIV/AIDS chungchangah ke pen nasa lehzual se a duh tih a sawi.
District Hospital Khawzawl medical officer Albert Lalhminghlua leh CODNerc DIC Khawzawl project manager Lalrammawia Ralte ten HIV/AIDS chungchanga hriat tur pawimawh an sawi a ni.
MSACS leh Saitual District AIDS Prevention Committee tangdun huaihawtin Saitual Keifang Dawrkawnah World AIDS Day pualin hun hman a ni a. Pastor Joseph Lalrammuana leh Dr Vanlalchhuanga ten thu sawiin, HIV dona kawnga inzirtirna an sawi bakah AIDS do chu damdawi lama thawktu leh AIDS prevention lama thawktute chauh ni loin, mipui tanrual ngai a ni tih an sawi.
Saitual bikah hian data-a a lan danin, 2020 atanga October 2022 thleng ICTC thisen test 4566 awmn, HIV positive percentage hi 1.13 a ni.