Thing phun tawh sa entha

National Pollution Control Day pualin Sakawrhmuituai tlanga thing phun tawh sa chu enthata a bul vel tih fai a ni a, bawlhhlawh awmte thenfai a ni bawk.
December 2 kha National Pollution Control Day a ni a, Inrinni a nih avangin December 1 khan Mizoram Pollution Control Board (MPCB) chuan a lawmnan Sakawrhmuituai tlangah programme a buatsaih.
MPCB EE PC Lalmuanpuii’n he huna tel Govt. Sihphir Venghlun High School Eco Club zirlaite leh zirtirtute bakah MPCB thawktute chu kan chhehvel boruak leh leilung tibawlhhlawh lo tura a fuih bakah bawlhhlawh thliar leh paih chungchangah hma la zel turin a chah. Kalkhawmten environment humhimnana nunphung thlak danglam ngaite thlak turin an intiam bawk.
Programme zawh hian kumin Green Mizoram Day lawmna atana Sakawrhmuituai tlanga an thing phun entha in a hmunhma hnim zualte an samfai a, plantation site banner tarin chhinchhiahna fel tak an siam a ni.
Sakawrhmuituai tlanga kal thinte bawlhhlawh paih chharkhawmin an paih nghal a. Hei bakah hian Sihphir khawchhungah sarang ip hmang lo tura inzirtir niin, lehkha ip (paper bag) zahnih chuang an sem a ni.
Kumin National Pollution Control Day pual hian pollution chungchanga inzirtirna ni pahfawmin MPCB bultumin district hrang hranga District Education Office (DEO) te hmalaknain zirlaite tan inelna chi hrang hrang buatsaih a ni.
National Pollution Control Day hi kumtin December 2-a hman thin a ni a. Kum 1984-a Bhopal Gas Tragedy-a nun chan ta te hriatreng nana tih niin, mipui hnena pollution chungchang inzirtir nan leh environment humhima tibawlhhlawh lo zawnga khawsa tura infuih thar nana hman thin a ni.