China BRI atangin Italy a inhnukdawk

Italy chu China belt and Road infrastructure initiatives atangin a inhnukdawk a. Italy hi G7 ram zinga BRI a inziak lut hmasa ber niin tunah a inhnukdawk ta a ni.
China hnenah pawh hrilhhriat nghal a nih thu Italian newspaper Corriere della Sera chuan a sawi a.
Mahse Italy emaw China-in emaw official a sawi engmah an la nei lo thung a. Mahse, Italian sorkar chuan Rome khawpuiah a inhnuhdawh thu a zep lo tia sawi a ni.
Italy Prime Minister Giorgio Meloni chu tun hma atang tawha BRI a Italy tel duh lotu niin Beijing in political influence a neih duh vang maia ngaih leh Rome-in hlawkpuina a nei tlem lutuk tia sel a ni thin.
BRI-a inremna hi March 2024 ah thar thawh leh hun chiah niin mahse Italy chuan kumin kum tawp hma ngeiin a titawp ta zawk a ni.
Chutih rual erawh chuan Meloni leh a hard-right government te chuan Beijing tihlungnih loh emaw chu an duh lem chuang lo va a chhan chu Italian company ten an tawrh an hlau a ni.
September thlaa Delhi-a G20 summit neihah khan Meloni chuan Rome chuan BRI a chhuahsan anga mahse ‘China nena kan inlaichinna engmah a khawih danglam lovang’ tiin a lo sawi tawh bawk.
Beijing chuan BRI-ah hian Uruguay atanga Sri Lanka thlengin ram 150 a huam tia sawiin China-in inzarpharhna a neih tumna kal zela President Xi Jinping a ngaih pawimawh ber a ni bawk.
Beijing chuan khawvel pumah 2 trillion dollar contract a kalpui tawh thu sawiin high-speed rail track South East Asia thlunzawmtute bakah Central Asia-a transport, enegrgy leh infrastructure work turu tak a kalpui mek tawh a ti bawk a.
BRI duhtute chuan Global South-a resources leh economic growth siamtu tur an ti a, mahse, sawiselna ber chu BRI-a tel ram te chuan leiba turu tak an neih zel vang a ni a. Chu mai bakah Chinese infrastructure firm te chuan ram thanglai mekah arpa chan an chang zel tih a ni bawk.
Khawthlang ramte chuan BRI hmangin China chuan ama hlawk nan global world siam a tum tia sawiin BRI-a tel ram te pawhin local politics-ah pawh Chinese influence a san zel tawh thu an sawi bawk.
Washington thung chuan China chu BRI investment humhimna tia chhuanlama hmanga ram hrang hranga military base din tum lo turin a lo vau lawk tawh thung.
Italy hi European union member a ni a, G7 member leh NATO member a ni bawk a. October 2022 a thuneihna a chan hma pawh khan Meloni chuan Italy-in BRI a zawm chu ‘tihsual’ a lo ti tawh bawk a ni.