Siamthat ngai zawng zawng kan siam tha ang – Zoramthanga

An party chu kumtharah an insiamtha vek dawn a, a siamthat ngai zawng zawng an siamtha anga, rawtna zawng zawng pawh an ngaithla vek dawn tih MNF president Zoramthanga chuan a sawi.
Thawhtannia MNF office Mizo Hnam Runa inkhawmah Zoramthanga chuan MLA inthlanah Zoram hmun hrang hranga party worker-te leh mipui thlawpnaah lawmthu an sawi tih a sawi a. MLA 10 Pathianin a pe chu lawmawm a tih thu leh hlawhtling lo zawkah tang mah se, tun inthlan result chu an thatna tur zawka Pathian remruat a ni tih an pawm thu a sawi a ni.
An party worker-te zam mai loa, rilru thar nen tan lak theuh a pawimawh tih sawiin, chak zawkin hei aia tha hian an kal anga, an tho kang leh ngei dawn tih a sawi. “Kan sawrkar loh avangin kan zavaiin kan na tih ka hria a, theihtawp kan chhuah veknaah erawh lawmthu ka sawi a ni. Pathian remruat hi dan zawh rual a ni loa, ZPM sawrkar turin Pathianin rem a ruat a ni tih pawmthiam ila, Pathianin Zoram hi enchhin ve reng reng a duh a ni,” a ti.
MNF party-in an sawrkar chhungin Zoram a that theih nan development tam tak an khawih a, an tlin lohna lian takah development that loh vang leh MLA candidate neih that leh that loh niloin, Pathianin an tana rem a ruat a ni tih an pawm thlap tih MNF president hian a sawi. “MNF hi party dang ang a ni loa, hnam thuthlung vuan tlattu leh nationalism kengkawhtu, Pathian leh kan ram tana din kan nih angin Pathianin MNF party a sawrkar leh theih nan kawng min sialsak leh ngei dawn a, kan tho kang leh dawn,” a ti.
MNF Legislature Party leader Lalchhandama Ralte pawhin inthlan felfai leh thianghlim tak hnuaia inthlan a ni tih a sawi a. A thawhpui hlawhtling zo ve lo erawh a tuarpui a. Pathian zarah an tho kang leh ngei dawn tih a sawi. “9th Mizoram Legislative Assambly-a kan Zoram kal lehzel dan kan relna turah hian mipui leh kan hotute thlawpna kan mamawh dawn a, thurawn pek kan mamawh a ni,” a ti.
He inkhawmah hian an party atanga MLA-a tling tharte lawmpuina hun buatsaih a ni bawk.