Serbia politics thununtu Vucic tling zui thei zel ang em?

Aleksandar Vucic chuan Serbian politics chu kum sawm chuang a thunun tawh a. A hmasa zawkah prime minister niin a hnuah president nihna a chelh leh a.
Amah thlawptute chuan pragmatic leader, Serbia harsatna sukiangtu leh economic growth thlentuah an ngai a. Sawiseltute chuan democratic norm mausamin a thuneihna sawhnghetah an puh ve thung.
President term khat kum nga chhungah a kum tawpna ber hmang mek a ni a. Thla kalta khan Serbia leh Kosovo tena buaina rei tak an neih tawh chinfel ngiata lungawi lohna lantirna a awm laiin parliament leh local election neih a rawt bawk a.
Kum 10 chuang a enkawl tawh Serbian Progressive Party (SNS) te chuan thuneihna an chan leh ngei a rinawm viaua sawi a ni.
Mahse opposition tangrualte chuan capital Belgrade mayor nihna chan ngei an tum thung a, Belgrade ah hian Serbia mipui hmun thuma thena hmun khat lawih an awm a. Mayor nihna an lak theih chuan Vucic pawh tal buai viau thei tura ngaih a ni.
A deputy prime minister hlui nena inngeih lo zui ta Zorana Mihajlovic chuan sawiselin ‘populist leader dictator ni mek’ tiin a sawisel thung. Watchdog Freedom house te chuan a kaihhruai ram chu ‘partly free’ an tihsak mek bawk.
Aleksandar Vucic hi kum 1970 khan Belgrade-ah a piang a, khatih lai khan Serbia chu Yugoslavia, Western Balkans-a socialist federation a la nih lai a ni. Indopui II laia Croatian fascists te avanga an chhungkuain Bosnia an chhuahsan thu a sawi bawk.
Kum 1980 chho vel khan UK ah chengin English a zir a. Hardware store-ah inhlawhin a hlawh hmangin radio tereuhte a lei chu a hawn a. “Ka nu leh pate kha an lawm takzet” tiin a hnuah London School of Economics-a thusawina a neihah a sawi chhuak.
Kum 1990 tir lama Yugoslavia a kehchhiat khan Balkans wars nunrawng tak a thleng a. Serbia and Montenogro bakah Serbia atanga inla hrang Albanian majority Kosovo te a hring chhuak a.
Serbian ultra-nationalism leh football hooliganism-in thutaka hnehin Vucic chuan far-right Radical party chu kum 23 mi lek a nihin a zawm a. Radicals te chuan greater Serbia aupuiin an thenawm ram chu chhuh an tum a ni.
“Serb pakhat in thah chuan Muslim 100 zel an thi ang” tiin July 1995-a Srebrenica massacre, Bosnian Muslim 8,000 chuang Bosnian Serb forces tena an tihhlum tukah a sawi nghe nghe a ni.
Kum 1998 khan Yugoslav strongman Slobodan Milosevic chuan Vucic chu a information minister-ah a dah a. Kha sorkarah khan Vucic chuan Europe-a freedom of speech khapna lam dan khauh ber a kalpui zui a ni.
Khang hun kha ethnic cleansing a khat a ni a, Croats leh Muslims huatna, inhrekna leh indona a khat a ni, tiin Zorana Mihajlovic chuan a sawi.
Kum 1999 khan Nato forces te chuan Kosovo a Yugoslava forces tena ethnic Albanians te laka tharum an thawh tih tawp nan a bomb tan a.
Rei lo te hnuah Vucic leh a thawhpuite chu thuneihna ata paihtlak an ni a. Kum 2008 khan amah leh Radicals member dangte chuan Serbian Progressive Party (SNS) an din zui ta a ni.
Mipui hriatah nasa taka insiam danglamin tun hmaa ultra-nationalism a kalpui te chu hnawlin Serbia chu European Union-ah a hruai lut a. Khami kum vek khan Kosovo chuan independence puangin mahse Serbia-in a la pawmpui ngai lo thung.
Serbian politics-a Vucic san chhoh dan a turu chak hle a. Kum 2012 khan SNS chuan parliamentary election-ah chakna changin Socialist Party te nen coalition sorkar an siam a. Vucic chu deputy prime minister atana dah niin a hnuah kum 2014 khan prime minister-ah dah zui a ni a. Kum 2017 khan president atana thlan a ni zui.
Hotu lu a nih hnuah a dinhmun a sawhnghet zel a. Amah dotute chuan kum 1990 chho vela authoritarianism an tawn ang kha an tawng leh mek tiin an sawi a. Mihajlovic chuan Serbia chuan EU leh democracy a hlat tial tial a ti bawk.
“Sorkar hian public institution leh media-te a thunun vek tep tawh a ni” tiin Florian Bieber, expert on Serbian nationalism, University of Graz chuan a sawi.
Vucic thlawptute chuan an sawiselna chu an pawiti lo thung a, Serbian politics a thunun theih chhan chu sorkar hlawhtling leh tha a kalpui vang an ti ve thung.
Vucic rorel hun chhungin ram economy nasa taka thangin post-communist ram indona avanga buai chu advanced European economy ah a hruai lut thei an ti ve thung.
Marko Cadez, head of the Serbian Chamber of Commerce chuan Vucic policy avangin tun hnai kum sawm chhungin Serbia GDP chu a let hnihin a thang tiin a sawi a.
“Aleksandar Vucic hian art of politics a hria a ni. Reforms awlsam lo leh khirh tak tak te a kalpui tlat a ni,” tiin a sawi.
Vucic ngei pawhin Kosovo nena inlaichinna tha leh mumal an neihah a hnathawh vang tiin a sawi bawk a. Mahse, September thla khan majority-serb northern Kosovo ah tharumthawhna chhuakin mi pali in an thih phah a, helai bial vel remna a tichhia ang tih hlauhna a lian hle thung.
Mashe Vucic chuan Kosovo nena inzawmna tha nei turin a inhawng tiin a sawi a, chuvang tak chuan opposition te erawh chuan phastantu angah an puh ve thung.
Serbia chuan EU zawm se a duh bawk a, Serbia sumdawnna zah ve lawih chu EU nena kalpui a ni a. Chutih rual chuan Russia nen inzawmna tha tak neiin Serbia chu Chinese investment tih nan a hawng bawk.
October thla khan China nen free-trade deal an ziak bawk a. Chinese company te chuan Serbia-ah kawngpui leh rel kawngte an siam a, Balkan ram chu President Xi Jinping an Europe a Belt and Road Initiative a kalpuia thlurbing ber pakhatah neih a ni. Eastern Serbia ah pawh Chinese company te chuan copper leh gold mine lian tak an enkawl mek bawk.
Nikuma Russia-in Ukraine a run tirh khan Vucic chuan Kremlin policy chu a dodal dawn lo a ti a, a chhan chu Serbians 85% te chuan eng pawh thleng se Russian an thlawp dawn tho tho tiin a sawi.
A thusawi ang ngei chuan a awm bawk a, EU-in Moscow an hrekna pawh a thlawp ve duh lo reng a, EU candidate status a nei reng chungin a pawisa lo. Russia chuan Kosovo chungchangah Serbia chu a thlawp tlat bawk.
Zorana Mihajlovic chuan Vucic chu a pro-Russian em em tihna a ni lo, a pragmatic vang zawk a ni a ti a. “Serbia lakhran a nih poh leh a thuneihna a sawh nghet mai dawn a ni,” a ti.
Kumin 17 December inthlan turah a dinhmun zel tur a lang mai dawn a. Serbia Against Violence (SPN) coalition chu poll ah chuan an dinhmun a tha hle thung.
Mahse Vucic erawhin chakna chang ngei inring thungin opposition te chu amah paihhtlak hrim hrim tum burah a puh a. “Inthlan zawhah tu nge nui kan la hre mai ang,” tiin a sawi.