Central scheme kalpui dan tur rel

Serchhip district-a sawrkar laipui scheme – Viksit Bharat Sankalp Yatra kalpui dan tur relin Thawhlehni khan district bawrhsap David Lalthantluanga hoin thutkhawm a ni.
Sawrkar laipuiin state sawrkarte kaltlanga scheme hrang hrang a kalpui mek a tak taka chhawrtu tur leh tangkaipui ber tur mipui mimirin chiang zawka an hriat a, anmahni leh an chhungkaw tana tangkai taka an hman ve ngei theihna tura mahni tawng ngeia inzirtir leh inhrilhriat chu sawrkar laipuiin a ngaipawimawh a. Viksit Bharat Sankalp Yatra hi 2023 November 15 atang khan sawrkar laipui chuan kalpui tanin state tinah kalpui mek a ni tawh a. Mizoram leh state dang pali, inthlan hmachhawnte tan erawh hun pawhfan sak an ni a. Mizoram hian December 14 hian state level-ah hawn leh kalpui tan a tum a ni.
Viksit Bharat Sankalp Yatra atan hian Serchhip district-ah lirthei (van) pakhat tirh a ni anga, December 18 atanga zin chhuak tanin Serchhip district khaw hrang hranga fang anga, heng khuaah hian function buatsaihin sawrkar official-te leh scheme kaihhnawiha mi pawimawhten mipui an zirtir dawn a ni. 2023 December 18 atanga tanin 2024 January 26 thleng van hi a zin kual dawn a ni.
District nodal officer bakah block level-ah nodal officer ruat an ni a. Central scheme kalpuitu department tin ten an department atangin a khawihtu tur bik officer an inruat theuh dawn a ni. Village level-ah committee din tur a ni bawk.