Sudan general indo mek ten inbiakna neih remti

Sudan general indo mekte chuan inkahhai a awm a, political talks hmanga tualchhung indona tihtawp a nih theh nana hmaichhana inbiakna neih an remti tiin African region bloc te chuan an sawi.
Sudan hi military chief Gen. Abdel-Fattah Burhan leh Gen. Mohammed Hamdan Dagalo, commander of paramilitary Rapid Support Forces te April thla laihawla Khartoum khawpuia an inbeih atangin a buai zui ta char char a ni.
Sudan hi kum eng emawti chhung chu dictator Omar al-bashir kum 2019 a paihthlak a nih atangin a buai tawh a. Democracy kawng a zawh chu hun rei lo te hnuah general pahnih tena October 2021 a military coup an kalpui avangin tihtawp a ni a. General lawk pahnih te hi a hnu thla 18 lekah an intithiam lo zui leh bawk si a ni.
Buaina avangin ramin a tuar hle a, October thla thleng khan nunna chan 9,000 chuang an awm hman tawh niin United Nations chuan a sawi a. Mahse, activists leh doctor’s group-te chuan nunna chan hi UN sawi aia tam daih a ni an ti thung.
East African ram group Inter-Governmental Authority on Development leader meeting chuan Sudanese general pahnihte chuan ‘intiamkamna awm lova inkahhai remtiin political dialogue neih an rem ti a’ tia sawiin ‘hmaichhana inbiak an remti a ni’ tiin bloc thuchhuak chuan a sawi bawk.
Sudan ruling Sovereign Council chair Burhan chu Djibouti a IGAD leader meeting neihah a tel ve bawk a. Dagalo erawh a awmna chi hriat ni loin IGAD leader te nen hian phone-in an inbe thung a ni.
Thuchhuah siam chuan khawi hmunah nge general pahnih te chuan an inbiak dawn a, eng hunah nge an inbiak dawn tih erawh a sawi lang lo thung a.
Djibouti president adviser Alexis Mohamed chuan Sudanese general pahnih te chuan ‘Ni 15 chhungin hmaichhana inhmuh remti dunin hmalak theih zuina tur an ngaihtuah ang’ tiin a sawi.
US President Joe Biden administration chuan general pahnih tena inkahhai siama inhmuh an remti chu lawmawm an tih thu sawi nghalin inbiakna chu neih nghal ni se tiin Mathew Miller, State Department thupuangtu chuan a sawi bawk.
Sudan buaina chinfel a nih theih nan IGAD chuan palai hna a thawk a, anni bakah Saudi Arabia leh United States te pawhin inbiakna a awm theih nan November thla atang khan hma an la tawh a ni.
Indona a chhuah tirh han inbeihna chu Khartoum khawpui chhungah a ni ber a, mahse, hun rei lo te chhungin khawthlang lam Darfur thlengin a fan zui ta a ni.
Mi maktaduai 6 vel chenna in leh lo chhuahsan lo thei loa siam niin mi maktaduai 1.2 vel te chu thenawm ramah raltlanin an awm tiin UN figure chuan a tarlang bawk.
Darfur region kum 2000 chho vela genocidal campaign kalpuinaah phei chuan buaina chuan ethnic violence hring chhuakin RSF leh allied Arab militia t chuan ethnic African group te an bei tiin rights group leh UN chuan a tarlang bawk.