MP thil tithei neih tum turin BJP-in mipui sawm

Lok Sabha inthlan neih turah Mizoramin MP thil ti thei tak tak a neih thei nan BJP Mizoram chuan mipui a sawm tih an party president Vanlalhmuaka chuan a sawi.
BJP Mizoram hian December 15 khan BJP State office-ah kumtawp inkhawm leh kumin atana office kharna hman a ni a. Thusawitu State president Vanlalhmuaka chuan kumtawp inkhawm an neih angin insiamthat an ngaihna apiangah mahni theuh insiam tharin, kumthar an chuankai hunah rilru thar nen hma laa inbuatsaih turin a chah.
Kum 2024 Lok Sabha inthlanah BJP-in Mizoramah MP a neih theihnan party member-ten an rilru siamthar a, MP neih ngei theih nan hma la a, MP thil tithei tak tak Mizoramin kan neih theih nan hma lakpui turin Mizoram mipui pawh an sawm nghal tih a sawi.
Bible leh tawngtai thlahthlam lo an tam poh leh an chak dawn a, chutiang mi chu BJP Mizoram hruaitute ah an awm tam a ngai tih BJP Mizoram president hian a sawi a. Pathian nena inzawm tlat nun neitu chu BJP Mizoram hruaitu atan an pawimawh tih a sawi a ni.