Zo hnahthlakte leh Meitei te’n ruang inpe tawn

Tun hnaiah Manipur state-a Zo hnahthlakte leh Meitei te’n an buaina vanga nunna chante ruang an inpe tawn a, hemi hnu hian boruak a hnim leh deuh tih thu dawn a ni.
May ni 3 a\anga an intihbuainaah hian nunna chan mi engemaw zatte ruang chu a lehlamte awmnaah a awm zui a, Lamka-ah pawh Meitei ruang pali a awm. Ministry of home affairs hmalaknain ni 14 leh ni 15 khan ruangte hi an inpe tawn a ni.
Zo hnahthlakte awmna Kangpokpi district-ah chuan mi 19-te ruang a thleng a, anni hi vuiliam nghal an ni. Mi 19-te bakah hian chin hriat loh mi palite pawh nunna an chanah ngaih a nih avangin vuiliam zingah hian an tel.
Lamka-ah chuan ruang 41 a thleng a, ruang 46 a awm sa bawk. Ni 20 hian vuiliam an tum a, mahse hei hi a la chiang chiah lo. Chhunah Lamka-a Peace Ground-ah mipui huapin anmahni thlahna hun hman a, chumi hnuah Lamka a\anga km 4 vel Mata khuaah phum an tum a ni.
Ruang awm sa 46 hi Churachandpur Medical College-ah dah a ni a, a thleng tharte pawh hi he college-ah hian dah nghal an ni. An chhungte tan a indawtin ruang en theihna hun hi an siam a, mipui huap chuan kawng hawn a ni lo.
Manipur hi an boruak a dai tawh viau a, mahse hetia ruang heti zat an inpek tawn hnu hian a rukin an boruak a \ang leh tih thu dawn a ni. Thil duhawm lo a thleng rih lo.
Kangpokpi lamah chuan nunna chante ruang an vuiliam hnu hian Zo hnahthlakte leh Meitei an inep \ha leh titih a, inhmachhawn tura a huhova inpante pawh an awm hman. Mahse an karah sipai an tlazep a, anni hian mipui inep tur hi an lo dang hman a ni.
Lamka-ah pawh an boruak a hnim tih thu dawn a ni a, rilru na \ha lehte an lo awm a, thil duhawm lo a thlen phah lo na a, a rukin an boruak a \ang leh tih thu dawn a ni.
Hnam pahnihte hi a hma angin an indo bur bur tawh lo a, an ralmuang tawh viau. Zo hnahthlakte khua pawh a tam zawk chu a hma angin chhun zan zawma ven a ngai tawh lo a, mahse Meitei nek khuate chu chhun zan zawmin an la inveng. An indo bur bur tawh lo na a, silaia han inralsai te chu a la awm tih thu dawn a ni.