W Phailenga College din tumna hlawhtlin loh hlau

West Phaileng MUP hruaitute nena an khuaa college din tuma ruahmanna an lo neih tawh chu sawrkarna an chan zawh tak loh avangin an puitlin thei loh a hlau tih Dampa bialtu MLA Lalrintluanga Sailo chuan a sawi.
Thawhtanni khan Dampa bialtu MLA hian W. Phaileng a tlawh a, khawtlang hruaitute nen an inkawmnaah Dampa bial khuaten an bialtu MLA ni leh tura an thlantlin avanga lawmthu sawiin, Dampa bialin nasa zawka hma a sawn theihnan a theihna zawng zawng hman a tum tih a sawi. Chutih rualin ram pumah sawrkarna an chan tak lohah chuan W Phaileng MUP hruaitute nen W Phailengah college din tura hmalakna kalpui an tum erawh tun sawrkarah chuan an ti thei lo mai ang tih a hlau a, pawi pawh a ti hle tih a sawi a ni.
Sawrkar hmasa lama W Phaileng Bazar sakna tur NEC kaltlanga a lo buaipui tawh, tuna Commerce & Industries department leh PWD kaltlanga sak tan mek chu Lalrintluanga Sailo hian a hmunah a enfiah a. He bazar hi W Phaileng mai ni lo, a chhehvel khuaten tangkai taka an hman thuai theihnan thawktuten tha taka thawk a, a hun taka an zawh theihnan tawiawm turin mipui a chah a ni.