Sports Personality of the Year 2023 an sem World Sport Star of the Year chu Haaland
Thawhlehni zan khan infiamna kaihhnawiha chawi-mawina ngaihhlut hlawh zinga chhiar tel kumkhua BBC Sports Personality of the Year 2023 award hrang hrang dawngtu puangin award an semchhuak nghal a, Man-chester City striker Erling Haaland chuan he hunah hian World Sports Star award dawngin, nikum khan BBC Sports Personality World Sport Star of the Year hi Lionel Messi kuta hlan a ni.
Norwegian hian 2022-23 season-ah khan Etiad club chu Premier League, Champions League leh FA Cup-ah a champion-pui fai vek a, Treble champion an nih theihna kawngah inelna hrang hranga a goal thun zat belhkhawm chu 52 tehreng a tling a, season khat chhunga ani aia Premier League club tana goal khung hnem an la awm lo.
Kum 23 mi Haaland hian season liamta khan Premier League-a goal thun tam ber chawimawina Golden Boot award pawh dawngin, match 38-ah goal 36 a puitlin a, record ni nghalin, English top flight season khata goal thun hnem ber a ni.
2022-23 season kha Norway striker Haaland tan Manchester-a a bultan kum niin, Borussia Dortmund atangin nikum Jue thla khan an leichhuak a, England leilung a rah phat atangin goal a khung chho nghal mawlh mawlh a, insiamremna atan hun a mamawh tam lo.
City thuam a inbel hnu hian chawimawina pawhin a um nghal tuk tuk a, Ballon d’Or award pawh kha dawng thei tura beiseitu an tam hle laiin World Cup-a Argentina champion-puitu Messi a ngam ta lo a, mahse, Ballon d’Or award dang Gerd Muller Trophy for best goalscorer a dawng zui ta tho a; tarlan tawh angin, best player thlannaah pawh Messi dawta vote hmu hnember a ni.
November thla mai khan Premier League goal 50 thun tling rangber niin, heti zat goal ngah tling tur hian game 48 chiah a mamawh!
Tun season kal laiah hian league goal 19 khawl tling leh tawhin, City-in a zawna Premier League title vawili lak tlin tuma an beih mekna kawngah Norwegian hi an innghahna lian a ni leh mek.
BBC chawimawina a dawn hnuah Haaland chuan award hlantute laka lawmthu sawi chungin season liamtaa Treble champion an nih thu a sawilang tel.
Sports Personality of the Year 2023-ah hian Man-chester City chu team of the year niin, Pep Guardiola pawh BBC Sport chhiar-tute’n coach of the year-ah an thlang.
BBC Sports Personality World Sport Star of the Year 2023 thlannaa Haaland hnaihbertu chu South African World Cup-winning rugby captain Siya Kolisi niin, vote hmu tam pathumna chu three-time Formula 1 world cham-pion Max Verstappen a ni.
World Sport Star of the Year 2023 award dawng thei tura chhawpchhuah dangte chu four-time Olympic gymnastics gold medallist Simone Biles, Spain World Cup winner Aitana Bonmati leh 24-time Grand Slam champion Novak Djokovic-te an ni.
Award hrang hrang dawngtute
World Sport Star of the Year: Erling Haaland
Team of the Year: Manchester City
Coach of the Year: Pep Guardiola
Sports Personality of the Year: Mary Earps
Young Sports Personality: Mia Brookes
The Helen Rollason Award: Fatima Whitbread
Unsung Hero award: Desmond Smith
from Yorkshire
Lifetime Achievement award: Sir Kenny Dalglis