Copa America khel lo tur inhliam Neymar

October thla World Cup qualifier match pakhata Brazil leh Uruguaya inkhelh tuma a khup veilam tina Neymar chu thla hmasa khan zai niin, kum thara khelh tur Copa America-ah hian a damchiang hman dawn lo tih tunkar Thawhlehni khan nem-ngheh a ni.
Brazil forward Neymar-a inzaina hian ngai a la awh lo a, a dinhmun vil rengtu national team doctor Rodrigo Lasmar chuan nakkum South America khaw-mualpui ramte football-a inelna sangbera Neymar a inlan theih loh tur thu hi Brazilian radio station Radio 98 FM a hrilh.
Brazil top scorer Neymar-a khup hliam zai kha Lasmar-a hoa hlenchhuah niin, kum 31 mi chu nakkum August thla herchhuah hma chu a fit hman dawn lo tih Brazilian doctor hian radio kaltlangin a puang a, kumthar June 20-July 14 chhunga United States lama khelh tur tournament lian atan a inpeihchhuak hman dawn ta lo a ni.
Lasmar chuan, “Hun a awm lo. Copa America khel tur chuan a la hma lutuk deuh. Rang zawka ngai awh tura pumpelh a awm lo a, tul loa risk lak tumna a awm lo.
“Kan beisei chhin dan chuan Europe lama 2024 season an tan rual velin khelmuala kirleh a inpeih hman hmel a, chu chu nakkum August thla hi a ni. Dawhthei taka kan nghah a ngai a, Thla kua tal a liam hmaa kirleh tum chu tinzawn chi a ni lo,” a ti.
Barcelona leh Paris St Ger-main forward hlui Neymar hian kumin August thla khan Saudi Pro League club Al-Hilal zawmin, Arab ram a thlen hnuah tihrawl na avangin a talbuai chho reng a, khup hliam a chhar hma thleng khan a club thar ta game nga chiah a khel hman!
Nakkum nipui thawt laia khelh tur Copa America-ah hian Group D-ah Brazil hi Colombia, Para-guay leh CONCACAF qualifier-te nen an awmho dawn.