Model tawi ber

New York Fashion Week runway-a a inlan hnuah, USA a cheng, khawvela hmeichhe damlai zinga mahni tawka che sawn thei lo zinga tawi ber, Wildine Aumoithe chuan chuan Guinness World Records, khawvela professional model tawi ber record a siam ta.
Wildine hi 72 cm (inches 28.3) a sang a ni a, Runway of Dreams: A Fashion Revolution event-ah inlanin, he event hi NFL linebacker lo ni tawh thin Shaquem Griffin host niin, pianphunga rualbanlohna chi hrang hrang nei model 70 chuang he event-ah hian an tel ve nghe nghe a ni.
Wildine chuan, “Runway of Dreams hi rualbanlo ten mahni inrintawkna an neih theihna tur leh fashion leh mawina lamah an inpholan ve theihna tur, charity pawl a ni. Hei hi ka tan chuan hun pawimawh leh chhinchhiah tlak tak a ni a, a chhan chu New York Fashion Week-ah Guinness World Records title holder runway a inlan hmasa ber ka ni,” a ti.
Wildine hian Target kutchhuak thawmhnaw a inbel a, Billy Footwear pheikhawk a bun bawk. Wildine chuan, “A nuam ka ti khawp mai, model te nen kan inhmu a, show host nen midang show chhimtu te nen pawh kan intawng a. Runway ka kal lai khan mipui kha engtianga tam nge tih pawh ka lo hre lo, mahse, nuam ka ti takzet a ni,” a ti.
Wildine hian dwarfism-ah pawh hriat tur tam lo tak SADDAN dysplasia a nei a, hei vang hian a kal thei lo va, wheelchair khawl nei chu chetvel nan a hmang ber a ni. A pian hlimah pawh doctor ten darkar 24 chhung pawh a paltlang zawh an rin loh a ni a, mahse, mak tak maia a damchhuah tak avangin thla ruk chhung hospice care-ah dah a ni a, chumi hnuah a chhungten inah an haw pui ve thei chauh a ni.
Tunah chuan Wildine hi kum 20 mi a ni tawh a, hetiang dinhmuna ding chung hian a beidawng ngai lo va, a duh leh chak zawng te chu tihpuitlin theih dan a zawng zel thin. Tunah pawh model nih a duhna chhan chu modeling industry-ah pianzia hrang deuh an tam loh vang niin a sawi a, “New York Fashion Week-ah te ka inlan ang tih chu suangtuah pawh ka suangtuah phak ngai loh a ni. Dwarfism community ten engkim kan ti ve thei tih lantir ka duh a ni. San zawng chu number mai mai alawm,” a ti.
Wildine hi 2021 khan kum 18 a tlinin khawvela hmeichhia, mahni tawka che sawn thei lo tawi berah Guinness World Record-in a lo puang tawh, GWR-in a record siam an puan hnuah a nun pawh a inthlak danglam nasa niin a sawi. Tunah chuan Graphic Design zirin college-ah a kum hnihna a kal mek a ni.