Chapchar Kut neih tur thlirlawk

Chapchar Kut 2024 lawm dan tur relin Thawhlehni khan Art & Culture minister C Lalsawivunga hoin department hotute an thukhawm a. Chief minister kaihhruai Chapchar Kut Organising Committee thutkhawm huna thlen tur rawtna leh pawimawh hrang hrangte an sawiho.
Minister chuan Chapchar Kut chu Mizoten Kut kan neih tlemte zinga pawimawh leh ngaihven hlawh tak a ni, tiin, hnam ziarang leh nunphung chawinun leh vawnhim nana hman tangkai a tul tih a sawi. Chapchar Kut lawm tawh thin dan aia tha leh inher danglam ngaite a awm a nih chuan inthlahrung loa thurawn pe hreh lo turin a chah a. Zau zawka khawvel hriat leh hmuh theih tura Mizo hnam ziarang leh nunphung pho chhuah a nih theih nana hmalak dan ngaihtuaha tan lak a tul tih a sawi a ni.
Thutkhawmah hian Chapchar Kut hman thin tawh dan leh NGO-te nena thawhhona hnuaia Chapchar Kut lawm thin dan report a ni a. Chapchar Kut Organising Committee chungchang, ngaihtuahna zau zawk senga Chapchar Kut lawm theih dan tur, senso ngai, lawm hun chhung tur, lawmna tur hmunhma, lawm dan tur program duan chhin leh Kut kentel thildang – food stall, exhibition stall, photo gallery /art exhibition, flower show, Zokhua leh a kaihhnawih pawimawh dang sawiho a ni bawk.