Provisional adhoc school dinhmun la siamtha thei lo

Mizoram Provisional Adhoc School Association hruaitute chuan Nilaini khan chief minister Lalduhoma an hmu a, an harsatna tawh mek an thlen a. An dinhmun siamthat
Chief minister hian sawrkarin a theih ang angin school tihhmasawn a tum dawn tih a lo hrilh a. Chutihlaiin tunhnai lawka sawrkar hmasain school thenkhat dinhmun a tihdanglam chu sawrkar tharin a la ngaihtuah hman lo tih a sawi.
Sawrkar sum dinhmun a that loh avangin kum khat chhung inpuahchah nana hman a tul dawn tih an lo sawi tawh thu leh sawrkar tharin budget an la pharh loh thu te sawiin, “Kan sawrkar huna hman turin kum hnih leh a chanve chhung education policy tur kan duanglawk tawh a, kei pawhin Delhi sawrkarin school a kalpui dan ka lo zu ngaihven tawh. Kan policy leh tuna in awmdan, school dang dinhmun pawh huamin uluk taka en a tul a. Cabinet-a pharh a tul anga, chuvangin tunah rih chuan engmah sawi theih ka nei lo a ni,” a ti.
Education minister a lo sawipui anga, inpawh taka engkim sawiho zui zel a nih tur thu in Provisional Adhoc hruaitute hi a lo thlah. A bialah pawh provisional adhoc school-a hlan thar school a awm ve tho thu sawiin, an dinhmun leh harsatna a hriatpui tih a sawi.
Nikum kumtawp lama sawrkarin school thenkhat dinhmun a tihdanglam zingah tunhmaa ‘lumpsum school’ tih thin chu provisional adhoc dinhmuna dah an ni a, an pawlah hian higher secondary school 34, high school 11 leh middle school 7 an awm mek.