Maruti Suzuki-in Rs 35,000 crore Gujarat-ah

Maruti Suzuki (MSI) chuan Gujarat-ah manufacturing facility pahnihna tur siam nan Rs 35,000 crore an invest tur thu sawiin kum 2030-31 ah chuan kum khatah 40 lakh unit siam chhuak thei tura ruahmanna an siam thu Suzuki Motor Corporation president Toshiro Suzuki chuan a sawi.
10th Vibrant Gujarat Global Summit (VGGS) neihnaa thusawina a neihah Suzuki chaun an plant te chuan installed production capacity 10 lakh unit per annum an neih tur thu a sawi bawk a.
“Gujarat-ah car plant pahnihna siam nan Rs 35,000 crore kan invest ang a, kum khatah one million unit kan siam thei dawn a ni,” tiin Suzuki chuan a sawi.
Plant thar hi FY2028-29 ah hman tan theih a nih beiseiin a hmun tur te en model te nge an siam dawn tih chu la sawifiah zui tur a ni thung.
Hei vang hian Gujarat-a annual production capacity chu 2 million (20 lakh) unita – Suzuki Motor Gujarat-a 10 lakh unit leh 10 lakh unit plant thara mi tur nen a ni tawh dawn a ni.
Japanese auto major Sukuzi Motor Corporation hian MSI ah 58% vel stake a nei a ni.
Suzuki chuan Prime Minister Narendra Modi-an manufacturing industry te a ngaih pawimawhna leh duhsakna avangin Indian automobile market chu a thang chak hle a ni a ti bawk a. Tunah chuan India chu automobile market lian ber pathumna a ni tawh tiin a sawi bawk a.
“India ramah kan production capacity pawh kan tilian zel a. Kum 10 kalta nena khaikhin chuan vehicle production hi a let 1.7 vel leh sales pawh tun fiscal hian 2.6 velin a pung turah kan ngai a ni,” tiin Suzuki chuan a sawi.
Kumin kum tawp rualin Suzuki Group te battery electric vehicle (BEV) hmasa ber chu phochhuah a ni ang a ti bawk a. “He model hi India ramah chauh ni lo Japan leh European ramah te pawh hralh kan tum a ni,” a ti bawk.
BEV production tihlen zel nan Suzuki Group te chuan Suzuki Motor Gujarat-ah Rs 3,2000 crore an invest belh a ngai dawn a, chu mi hmang chuan 2.5 lakh unit kumkhatah an siam chhuak thei dawn a ni, tiin Suzuki chuan a sawi bawk a. Hei vang hian Suzuki Motor Gujarat atanga annual production capacity chu tuna 7.5 lakh atangin 10 lakh unit-ah a kai chho dawn a ni, a ti bawk.
Fourth line chu FY2026-27 atagin hman tan theih a nih an beisei thu sawiin Suzuki chuan greenhouse gas emission tihtlem chungchangah an group chuan kawng hrang hrangin hma an la dawn tiin a sawi bawk a.
“Chumi tur chuan vehicle electrification mai bakah thil hrang hrang compressed natural gas, biogas, bioethanol leh green hydrogen te pawh kan ngaihtuah tel,” tiin a sawi a.
India-in animal wealth a neih that chu hmang tangkaiin bawng ek atanga biogas siam chhuah an tum thu a sawi bawk a. National Dairy Development Board leh Banas Dairy te nen Gujarat ah biogas plant pali an siam tan mek tawh thu Suzuki chuan a sawi a ni.
Suzuki group chuan sustainable customer-oriented mobility option pawh pek an tum thu a sawi bawk a. India rama car siamtu lian ber Maruti Suzuki hian kum 2030-31 chhungin 20 lakh unit-production capacity bakah market ah model hrang hrang 28 vel belh leh an tum a ni.
Tun dinhmunah auto major te hian kum khatah an manufacturing plant pahnih Haryana leh Gujarat atangin 20 lakh units vel vehicle an siamchhuak thei mek a ni. Haryana a Gurugram leh Manesar atang ringawtin kum khatah 15.5 lakh units vel an siamchhuak a.
Suzuki Motor Gujarat te hian Gujarat-a facility an neih atangin kum khatah 7.5 lakh units vel an siam chhuak bawk a. Heng bakah hian car market leader te hian Haryana a Sonipat-ah investment Rs 11,000 crore an kalpui mek bawk a. He plant hi kum khata 2.5 lakh unit siamchuak thei tur niin nakumah hman tan theih beisei a ni.