Kum 2022 aiin kum 2023 ah Lungleiah pawikhawihna tam

Kum 2022 aiin kum 2023 ah Lunglei distgrict-a police station-ah thubuai ziahluh chu zaah 24-in a pung a. Kum 2023-a thubuai ziahluh zawng zawng atanga zaa 57 chu rukruk (theft) leh in rawk (burglary) thubuai a ni.
Lunglei Police Station-ah kum 2023 chhung khan thubuai 237 ziahluh a ni a. Kum 2022 khan thubuai 192 ziahluh niin, kum 2023 chhunga thubuai 237 an ziahluh zingah hian in rawk a tam ber a, case 78 a ni. Hei hi kum 2023 chhunga thubuai an ziahluh zawng zawng atangin zaa 33 a ni. In rawk bakah hian rukruk thubuai 57 ziahluh niin, hei hi thubuai ziahluh atangin zaa 24 a ni a. Heti hian rukruk le in rawk thubuai pahnih belhkhawm chu 135 niin, heng thubuai pahnih hi thubuai zawng zawng ziahluh zahve aia tam, zaa 57 a tling.
Kum 2023 chhung khan Lunglei district-ah tualthah thubuai 1 ziahluh niin, kum hmasaah pahnih ziahluh a ni. Kum 2022 ah pawngsual thubuai ziahluh a awm loh laiin, nikum khan Lunglei Police chuan thubuai 2 an ziaklut. Naupang chunga hursualna pawh nikumah hian kum hmasa aiin thubuai a pung a. 2022 khan thubuai 8 ziahluh a nih laiin, 2023-ah 13 ziahluh niin, a punna hi zaa 63 a ni.
Kum 2023 chhung hian inbumna thubuai 4 leh kut inthlak thubuai 4 ziahluh a ni a. Tang tlanchhuak thubuai pahnih, naupang rukbo thubuai 2, insuam thubuai 1, dan lova silai kawl thubuai 1 leh ND&PS Act thubuai 10 bakah IT Act hmangin thubuai 3 ziahluh a ni.
Nikum chhung hian May thlaah thubuai ziahluh zat tam berin, 25 ziahluh a ni a, November leh December thlaah thubuai 15 ve ve ziahluh niin a tlem ber thla an ni.