Bawlhhlawh paihtuten an lungawilohna titawp

Aizawl khawpui chhunga bawlhhlawh khawn leh paih hna thawktu lirtheiten an sum dawn tur an dawn loh avanga lungawilohna an lantir mek leh a aia nasaa lantir tuma an tintuah mek chu an titawp lailawk.
Aizawl Garbage Vehicle Owner Association (AGVOA) thuchhuak chuan October 2023 atanga an tlanna man (bill) an lak theih loh avangin lungawilohna lantir nan kumin January 8 atang khan bawlhhlawh paih lirtheiah flag dum an tar a. An harsatna an auchhuahpuina hi sawrkar hotuten ngaihpawimawh sakin, hemi ni vek hian state sawrkar chuan a tum ve tur sum chu Aizawl Municipal Corporation-ah pe nghalin, AMC pawhin October leh November 2023-a bawlhhlawh paih man atanga an tum tur zaa 60 chu January 12 khan local council-te bank acount-ah a thunfel tih a sawi. December 2023 bawlhhlawh paih man pawh kar thar lamah local council bank account-a dah hman turin AMC hian hma a la mek tih a sawi bawk.
‘Sawrkar hmalaknaah hian lungawi phawt tha kan ti a, mipui harsatna siam zui loh tha kan ti. Kan lungawilohna lantirna pawh January 12 tlai atang khan an titawp tih an puang a. Bawlhhlawh paih lirtheia flag dum an tar chu member-ten la thla turin an inhriattir a. January 15 atanga bawlhhlawh paih lirthei zawng zawng ding tura thu an lo chhuah tawh pawh sut nghal a ni,’ AGVOA chuan a ti.
An harsatna min hriatthiampuitu state sawrkar leh AMC hotute chungah an lawm tih an sawi a. Local council hruaitute pawh bawlhhlawh paih lirthei neituten an tlan man an hmuh thuai theih nana chak taka hma laksak turin an ngen tih an sawi.