MLA-te hriat tur hrilh

Mizoram Legislative Assembly member-te tana ni thum awh Leadership Innovations Training chu kar kalta khan Assembly Secretariat leh Administrative Training Institute (ATI) tangdunin an buatsaih.
A kharna hun hmanpuitu chief minister Lalduhoma chuan engemaw harsatna avanga tel thei lo MLA-te pawh study material pek vek an nih dawn avangin ruahmanna fel a tih thu a sawi a. Tunkar hian training hi Delhi-a chhunzawm tur niin, training buatsaih sak an nih chhan chu, legislator tha an nih theih nan a ni tih a sawi.
“A zir zui peih leh peih lo kan inthlau thei viauin a rinawm a. Tunlai khawvelah technology a san tawh avangin tunlai thil thar ber ber man phak kan nih a ngai a, chutiang tura kan inbuatsaih zel chu a pawimawh a ni,” a ti. Legislator tana thawhrim a pawimawhna, zir peih a tulzia leh thil thlir thiam a hlutzia a sawi bawk.
MLA-te aiawhin Home minister K. Sapdanga’n thu a sawi a. Training buatsaih saktu leh resource person te chungah lawmthu sawiin, ni thum chhunga an thil zir zawng zawng hre bel hman vek lo mah se, an training hian legislator ni tura hriat tur a tam zia a hriattir a, an hlawkpui hle tih a sawi.