Ex-servicement tan MoU ziak

Sawrkar laipuia Ministry of Defence chuan Mizorama Ex-servicemen Contributory Health Scheme (ECHS) hmathatna dawngtuten super-specialty cancer treatment an dawn theih nan Mizoram State Cancer Institute Aizawl chu thawhhona thuthlung (memorandum of understanding) a ziahpui.
Headquarters Eastern Command, Headquarters 101 Area Shillong leh Central Organization ECHS aiawhin ECHS Regional Centre Guwahati director Col. Jitender Mann leh Mizoram State Cancer Institute director Dr Jeremy Lalrinsanga Pautu ten hming an ziahhnan a ni.
MoU ziah a nih tak avang hian MSCI chu ECHS-ah empanel a ni a. ECHS Polyclinic Aizawl leh ECHS Polyclinic Lunglei atanga damlo refer-te chuan an ECHS card hmangin a thlawnin super-specialty cancer treatment an dawng thei tawh dawn a ni.
ECHS Polyclinic Aizawl leh ECHS Polyclinic Lunglei hi Station Hqrs Aizawl enkawl niin, Mizorama ex-servicemen inenkawlna lamah thahnem ngai takin Hqrs Eastern Command leh Hqrs 101 Area Shillong nen an thawk ho. MoU ah hian ex-servicemen leh an chhungte inenkawlna kawnga Guwahati, Kolkata leh Delhi an pan thinnaa an phurrit chu a chhawk zangkhai tura ngaih a ni.
ECHS hi ni 2003 April 10 atanga Ministry of Defence Department of Ex-Servicemen Welfare-in a kalpui tan tawh a. He scheme tum ber chu, ex-servicemen leh an chhungte tan changtlung taka damlo inenkawlna pek a ni. Chumi tih theih nan chuan India ram pum huapin ECHS Polyclinic leh Armed Forces medical facility te an nei a. Private emaw sawrkar damdawi inte nen an thawk ho bawk.