Entreprenuer thate tan kawng zau tak kan hawng – Chief minister

Mizo thalai, entreprenuer thate tan sawrkarin kawngka zau taka a hawnsak tih chief minister Lalduhoma chuan a sawi.
Luangmual Industrial Growth Centre-a Anna Food Production Industry a hawnnaah chief minister chuan, kan rama hmanrua awmsa hmang tangkai thiam a, kuthnathawktute thil tharchhuah sawngbawl thiam leh mipui awlsamna thlen thei hmalakna nei thiam kan mamawh tih a sawi a. Anna Food Production Industry chu bawnghnute thartute tan industry tangkai leh an hlawkpui tak a nih a beisei tih a sawi.
Mizoram sawrkarin ‘Hand Holding Policy’ hmangin Mizo thalai, entreprenuership lama tui tan ruahmanna tha tak a siam tih a sawi a. Hemi kawngah tumruhna tak tak nen theihtawp chhuah turin a sawm tih a sawi a ni.
Agriculture minister PC Vanlalruata chuan industry neitute an la tam loa, a ti chhunte an hlawhtlin thin avangin midang luh belh zel se a duh tih a sawi a. Loneitute tharchhuah state pawna hralh tlak ngeia sawrkarin sawngbawl a tum dan a sawi.
Anna Food Production neitu Daniel Lalawmpuia sawi danin, kum 2020 khan belpui pakhat leiin a nupui nen bul an tan a, kar khat chhungin belpui 8 an mamawh belh. Sum engmah nei loa bul tan an nih avangin harsatna an tawk nasa a, SBI Dawrpui Branch-in engmah nei lo chungin an ring ngam a, an industry a puitling thei ta tih a sawi.
Anna Food Production food technologist K Zobiakvela sawi danin, an hmanraw hman tur leinan cheng nuai 104 an seng tawh a; bawnghnute supply turin Muthi lama bawng vulhtute nen Society an din tawh a ni. Tunah hian lassi deuh chauh an siam rih a, bawnghnute siam chu an tum ber tur a ni.