Ramri hung chungchang…

Kar kalta Inrinnia Assam Police Commando battalion thar panga a hawnnaah union home minister Amit Shah chuan, Northeast India state pali – Mizoram, Manipur, Nagaland leh Arunachal Pradesh-te leh Myanmar inrina km 1643-a thuiah, India leh Bangladesh ramri hungna siam a lo nih tawh angin, border fencing siam a nih ve tur thu a sawi a. Hei bakah hian India leh Myanmar ramria inkalpawhna free movement regime (FMR) chu hlih a nih tur thu a sawi bawk a.
Hemi chungchangah hian MZP chuan, Myanmar leh India ramria zalen taka inkalpawhna, Free Movement Regime (FMR) hlih tum duh lohna leh Myanmar leh India inkar ramri hung tum duh lohna Memorandum chu prime Minister hnenah an thehlut a; dodal tlat an tum thu an sawi nghal bawk a. Dodal a nih chhan hrang hrang sawi lang bawkin India sorkar chu a thutlukna ngaihtuah nawn leh turin an ngen a. “Ramri hunga inthendarh kher lo hian ruihhlo leh a kaihhnawih tawlhrukna chungchangah hian ngaihtuahna fim tak hmanga a chinfelna tur kawng dang zawn theih a ni tih kan ring” tih an zep tel bawk a ni.
FMR chungchang hi January thla tir lam khan sawrkar laipui chuan an lo sawi ri tawh a, a hnu lawkah Mizoram chief minister chuan external affairs minister S. Jaishankar nen an inkawmnaah a pawm loh thu a lo sawi tawh bawk a.
MZP lamin ruihhlo leh a kaihhnawih tawlhruk chu ramri hung tum chhan ni thei anga an sawi rik lai hian, sawrkar laipui lam hian ruihhlo leh a kaihhnawih lam hi a chhan leh vang lamah an sawi ri tehchiam lo niin a lang a. Ruihhlo tawlhruk hluar hi ramri hung tum chhan anga kan ngai a nih phei chuan, ruihhlo lo lut tur lo dan kawngah tun aia a let tam taka tan kan lak a ngai tihna a ni a, ruihhlo do beihpui thlak kan mamawhzia hriattharna leh tan lak thar nan te hmang tel thei ila, a duhawm hle awm e.