Revd (Dr) Chuau|huama Chair-ah ka |hu

Commissioner Lalkiamlova

Ni 16 January 2024 khan thil tih chakawm loh tak, tih ngei ngai si, Revd (Dr) Chuauthuama’n Bible translation draft a siam chhuahna Laptop chu an ina a office atangin, kan Auxilliary Secretary, Revd Remlalfaka leh Rev John Lalrinawma, Pu Chuauva puitu nen kan pathumin kan han la a. Rilru a va kal thui duh teh reng em! A room-ah ka va lut a, Thûl pahnih ka hmu hmasa bera, Mizo in dik takah ka lut tih min hriattir. Chumi piah lamah chuan mi ropui, kohhran tan leh ram tan pawh a hlutzia sawi chhuah sen rual loh chet tlatna hmun chu a awm. A office-a a thil kalsante chu a ngai ngaiin dah a la ni a, han en reng reng pawh hian a buai turzia a lang reng mai. A dawhkan chung leh a velah chuan, Bible lehlinna leh a sermon leh a article ziakna tura a hmanruate chu hnai takah an inchhawp rep rup a. A mamawh hun apianga a ban a, a lak theih mai tura inringin an hual tuau mai a ni.
Chu mi ropui leh ngaihsanawm tak chair ruak, a khawhar ve a ni tih hriat tak mai hmel han hmuh zet chuan patling tan pawh mittui sum a va har em! Theih nise a chair hian thlawh chhoh ve nghal a duh ngei ang! Chu chair sen vat maiah ngei chuan ka han thu ve a, inhmeh ka inti lo chungin, tunlai danin, a fanu neih chhun, Dr. Elsa-i, Chennaia lehkha a zir laia kan ward chu thla min hmehsak turin ka ngen a. Min rawn hmehsaka ka lawm hle mai. Mi ropuite ropuina hi an office len leh hmanraw that lama teh tur nise, he office hi office ropuia chhiar a ni lo vang a. He office luahtu ngei pawh hi mi ropuia chhiar a nih ka ring lo. He room-a ka awm lai hian, William Barclay-an, “kohhran ropuina chu a biak in ropuina leh, member tam leh sum leh paia a hausakna lam atanga teh tur a ni lova, kohhran member-te nuna Pathian Thlarau hnathawh lan chhuah dan atanga teh tur a ni,” a tih te kha ka ngaihtuah chhuak a. Office ropuina pawh hi a hmanrua leh a len zawngah teh tur ni lovin, a hna thawh chhuah atanga teh tur a nih hi, ka ti ta a ni.
He office, a lan dana hnawk tak leh tlawm takah ngei hian Mizo pa ngei, khawvela tawng un leh pawimawh tak tak pali – Hebrai, Greek, English leh Mizo tawngte thiam tha em emtu, Revd Chuauthuama khan a chhun azanin hna a lo thawk thin a. Heta tang ngei hian Bible Society of India in Mizo Revised Version buatsaih tura a ruat ten an en ho tur, Thuthlung Hlui leh Thuthlung thar zawng zawng draft copy a rawn siam chhuak thin a ni. He Mizo Bible Version thar, Mizo Revised Version tia hriat tur hi a tawp thlengin min ho thei ta lo mah se, a hmangtuten amah kan hriatrengna chu a dai tawh ngai lo vang. He room, a lan dana tlawm tak atang hian Bible translation draft chauh a thawk chhuak a ni lova, Vanglai nia a column-a chhuah tur te, Thu leh Hla Magazine-a chhuak tur zawng zawngte, seminar, retreat leh training hrang hranga a hmanrua turte a buatsaih thin a ni.
Revd. (Dr) Chuauthuama hi, Grik, Hebrai, English leh Mizo tawngte a thiam avanga Bible lehlinnaah hian tangkai em em a ni mai lo va. Bible ram chanchin a hriatna hian a qualified-tir bawk a ni. Bible-in Israel fate khawsakna ram, an pem kualna, an indona hmun leh hmate hi a hre chiang em em a. Han sawi ho pawhin “Nia, kha lai mual mawng kham chhawrdawh hnuaiah khan, tih te, kha lai mual hmar chhawng pangperah khan,” tih te thlengin a sawi thei zel a ni. Jerusalem khawpui a hre chiang em em a. A kulh leh Lal Isua sulhnu te a bik taka zira chhui a ni a. Isuan kraws kawng a zawh thui zawng, eng chen nge chho deuh awm a, zawl awm a, chhuk deuh awm tih zawng zawng a chhin chhiah vek zuk nia. Mi hetiang kan chan hi Bible translation lama a thiante bik hi kan tik dial dial a, kan chal kan dawm a, sawi ngaihna kan hre lo, zoram khawvel tan hian kan ui ngawih ngawih a ni ber mai.
Revd. (Dr) Chuauthuama hian mi hriat a hlawhin a lar a ni mai lo, kohhran leh ram tana a pawimawhna hi a sang a ni. A vui ni khan ka ngaihtuah neuh neuh va. Zoram khawvel-ah leh mizote awmna chinah chuan a ni tluka pawimawh leh lar hi awm chuangin ka hre lo va. Myanmar lama Mizote leh US lama Mizote pawhin vui a nih rualin sunna hun an lo siam ve hial kha a ni a. Hetianga mi ropui leh mi bik tak mai, international bnoundary kana hming tha leh hriat hlawh, a ruang hi ni khat tal chu han kawl leh ni ta se, hmun thawl zawk, a lawina Biak in varandha-ah emaw dah ni sela. A hmu duh apiangin, in su buai hauh lovin an kal pelin an hmu thei ang a, a va tha dawn em aw, tihte ka ngaihtuah a ni. Chutianga tih chu nise, Aizawl khawpui veng hrang hrang chu sawi loh, Lunglei, Kolasib leh khaw hrang hrang atangin kha mi ropui mual liam mek kha, en turin an lo kal khawm ngei ang. A thih nia a hmel hmu duh tam si, hun rei si lo, an in luhna step-ah mi kan thu khat tlat mai bawk si. A hmel hmu zo lo chhuak leh hmu chak luh tum nen, kan in su buai nuaih nuaih mai kha a ni si a.
Mizoramah hian mi lian leh mi tê, hausa leh retheite inkar a zau loh nan tiin, ruahmanna nghet ang reng tak : an thih hun azira vui hun tur, thla lak zat, kuang chunga pangpar dah leh dah loh, inneih puan chhawm zat te, siam a ni a. Mi chhung kaw lungawina ngaihtuah miah lova dan neih hi thil dik leh tha ber a ni ang em let Khawvel ram dangah hetiang hi awm ve tak maw? An fa duat ngawih ngawih an enchim loh, an bawihsawm hauh lovin phaiah an thi a, a ruang lo thlen darkar la laa invui nghal chuk chuk maite hi, nu leh pa leh chhungte tan a va na dawn tak em! ka ti thin. Chung zawng zawng ka ngaihtuah lai chuan, mizote tana pawimawh ka tih tak ber chu, mi tin, tu mah thik lova, mahni chhungkaw khawsakna dinhmunin a tlin ang tawka lungawi tura inzirtir hi a ni, tih hi a ni ta a ni.