Aikal lak tihtawp tum thlawp

Mizo Zirlai Pawl chuan Mizoram sawrkarin zirtirtu aikal lak titawp tura hma a lakna chu an thlawp tih sawiin, sawrkar tha tichak tura tan lak an tum thu an sawi.
MZP Gen. Hqrs. thuchhuak chuan, zirtirtu aikal lak titawp turin School Education minister Dr Vanlalthlana pawh chak taka hma la turin a ngen tih a sawi a. 2024 February 10 ralhma ngeia aikal la leh mahni post-a awm lote chu an hnena report turin Headquarters, Sub Hqrs leh Branch a hriattir tih sawiin, February thla ral hmaa chingfela hma lak an tum tih a sawi.
India leh Burma ramria zalen taka inkalpawh theihna, Free Movement Regime (FMR) thiah tumna awm chu Mizo hnam inpumkhatna leh inunauna tichhe thei tur a nih avangin a tawp thlengin dodal zel an tum tih a sawi bawk.
Bangladesh atanga an sahimna zawnga raltlante India sawrkar central force-ten an lo dan fo lai a, Burma-a Zofa unaute tibuaitu ber Burma (state administration council) sipaite zalen taka an ralthuam nen awlsam taka ramri an rawn kan fo chu tha lo an tih thu MZP hian sawiin, ‘Civil mi tanpuina mamawha lo lutte laka an khawng em em lai a, buaina siamtu ber Burma sipaite a ngaihsak em em leh duat taka an thawnkir fo hian mit a tikham hle a; Mizoramah Burma SAC sipai hi lo lut tawh lo turin kan duh a ni,’ a ti.