2024 Oscar Nominations-ah Oppenheimer a langsar ber Hot ber

Lemchan lama chawimawina sang bera ngaih Oscar Awards chu kumin atana nomination an puang leh ta a, Oppenheimer langsar berin nomination 13 a nei. Kumin ian thil danglam thleng a awm nual a, Oscar history-a avawi khat nan best picture category-ah sap tawng hmanna ni lo film pathum a lang tlat mai. Heng film pathum te hi Anatomy of a Fall, Past Loves leh The Zone of Interest te an ni. Heti hian tun kum ruk chhung chu a zawnin best picture category-ah hian nomination-ah sap tawng hmanna film ni lo pakhat tal an la lang ta ziah a ni. Mak ang reng takin thawm nei lian tak Barbie chu best picture-ah hian nominate a ni lo tlat mai a, a changtunu Margot Robbie pawh best actress category-ah nominate a ni lo a, hei hian boruak pawh a nei deuh halh nghe nghe a ni.
Kumin nomination-ah hian actor pahnih chu lead acting category-a nominate an nih bakah best picture film-ah producer angin an lang tel a. Bradley Cooper chu Maestro avangin heng category pahnihah hian langin, Emma Stone pawh Poor Things avangin a lang ve ve bawk. Emma Stone hi hmeichhe zingah tum khata acting leh best picture a nominate nikawp thei pahnihna a ni. Bradley Cooper hian Oscar nomination 12 a neih tlinna a ni ta a, Emma Stone-i’n a panga a nei tling ve tawh thung.
Barbie hi best picture-ah nominate ni lo mah se a film atanga hla pahnih- ‘I’m Just Ken’ (Mark Ronson leh Andrew Wyatt te phuah) leh ‘What Was I Made For?’ (Billie Eilish leh Finneas te phuah) chu best original song-ah a lang ve ve a, kum sarih liamtaa La La Land hnua Oscar nomination-ah film pakhat atanga best song nominee pakhat aia tam nei leh thei hmasa ber a ni.
John Williams chuan scoring category-ah Indiana Jones and the Dial of Destiny avangin nomination a nei leh a, he category-a Oscar nomination 49 a neihna ni tawhin, best original song category-ah nomination panga a neih tawh nen phei chuan Oscar nomination a neih tawh zawng zawng chu 54 a tling tawh a, tuna damlai zingah chuan Oscar nomination a lang ngun ber a ni a, ani aia lang tam pakhat chiah a la awm a, chu chu Walt Disney niin, ani hi a boral tawh a ni. John Williams hi kum 91 a upa a ni tawh a, competitive award category-a nominate ni thei upa ber a ni bawk.
Kumin Oscar Award hi a vawi 96-na tur niin March ni 10-ah an sem dawn a, tum dang ang bawkin Dolby Theatre, Ovation Hollywood-ah sem a ni leh dawn a, Jimmy Kimmel-a’n a host dawn a, Oscar award show tum li a host-na a ni dawn ta a ni.