Auto-rickshaw driver ruang hmuh a ni Driver thattu mi pathum police-in man

January ni 24 zana mi pathum kuta tualthi Siaha Auto Rickshaw driver Tv. Zawasa kum 21 ruang chu ngawrh taka zawn a nih hnuah nimin January ni 25 tlai dar 6 vel khan Lawngtlai district chhung KMMTTP kawng Mampui peng atanga KM chanve vel, Refugee camp panna kawngpeng thlanglamah hmuh a ni.
The Aizawl Post thudawnnain a sawi danin auto-rickshaw driver thattute hi mi pathum niin, Lawngtlai police-ten an man tawh a, nizana chanchin thar buatsaih lai hi chuan police-ten thu an zawtfiah mek a. Heng mi pathumte hi Zakhai hnam (Rakhine), Siaha vela khawsa nia sawi an ni a, refugee camp-a awm mek anga thu thehdarh chu thu dik tawk lo niin thudawnna chuan a sawi a; tualthattute hi mi pali anga social media lama thu thehdarh pawh thu dik lo niin a sawi bawk.
The Aizawl Post thudawnna chuan, heng mi pathumte hi Lawngtlai lama bike part lei tur niin Lawngtlai atanga an kir leh hnu hian auto-rickshaw hman manah an thu inhmu lovin, a hmangtute hian kut an thlak ta mai niin a sawi.