Kalchheta kal intlar thui record siam

Pathianni kalta khan Bokolia, Karbi Anglong, Assam-ah chuan a rualin mi 721 chu kalchhet in an kal (stilt-walking) a, km 2 a thui intlarin, a ruala kalchheta kal intlar thui ber record an siam tih Guinness World Record-in a puang.
Record siam tur hian Diphu bula Bokolia Bypass-ah kalchhet nen an puang khawm a, km 2 a thui intlarin, minute 10 chhung an kalchhetin an kal a ni. Record siam tura mamawh zat chu 250 a ni a, mahse, he record thar siam tur hian mi 721 an tel a, kalchheta kal chunga intlar thui ber record an siamta a ni.
Record siamnaah Guinness World Record aiawha endiktu Rishi Nath a tel a, ani hian Karbi Anglong Autonomous Council Chief Executive Member, Tuliram Ronghang hnenah record an siam tih hriatpuina certificate a hlan nghal a ni. He record siam hi Diphu-a Karbi Youth Festival kum 50 tlin lawmna peng pakhat atana an tih a ni a, Karbi Cutural Society nena tangkawpin KAAC hian an buatsaih ani.
Ronghang chuan, “Kan traditional sport khawvel hriata phochhuah a ni hi hlawhtlinna pakhat a ni. Hetiang record hi a la awm ngai lo, a hmaa kalchhet hmanga record siam chu Sweden-ah mi 956 an ni a, mahse, tlar khat (single line) a ni lo,” a ti.