Hydel project tenau siamna scheme Mizoram tan duang

Mizoram anga hydel project tenau siamna tur scheme a duang a, cabinet pawmpui tura chhawpchhuah a ni dawn.
Power & Electricity minister F Rodingliana’n New Delhi-a amah a hmuhnaah Union Minister for Power and New & Renewable Energy RK Singh chuan tlangramin a bawh Mizoram ang mil tur small hydel project siamna tur scheme thar cabinet pawmpui tura chhawp chhuah a ni dawn, tiin, pawmpui a nih veleh proposal thehlut tura an rawn hriattir tur thu a sawi a. Rooftop solar subsidy rate chu zaa 40 atangin 60-a tihsan a nih tur thu sawiin, phalzat bituk awm loa proposal lut ang ang an pawmsak tur thu a lo hrilh.
Mizoram tan 10% Gross Budgetary Support hnuaia power project 6 thawhna tur sum, vaibelchhe 273.21 chu DoNER ministry lama tihfel ngai la awmte tihfel a nih tur thu leh a rang thei ang bera pekchhuah tir a tum thu a lo hrilh bawk.
Mizoram minister hian Union Minister for Fisheries, Animal Husbandry and Diarying Parshottam Rupala chu a chenna inah hmuin bawng leh kel vulhna tur project an thehluh tawh chu a bawhzui a. Central scheme hnuaiah project tha tak tak a awm thu Union minister hian lo hrilhin, bawhzui dan leh hmalak zui dan a lo kawhhmuh a; kumin February 15 hmaa bawhzui leh turin a lo chah a ni.

8 Tunlai thiamna thar ber hmanga Pumped Storage Hydropower Project Mizorama hman a nih ve theih nan he project kalpui mekna state – West Bengal leh Andhra Pradesh-ah hmalak dan kimchang zirchiang turin Mizoram atanga study team tirh P&E minister-in a dilna chu Union minister hian a remtih sak.
8 Kawlphetha lak leh sem dan kalphung tihchangtlunna tur central scheme – Revamped Distribution Sector Scheme hnuaia thawh smart metering leh thildang chu tun financial year chhunga sum pekchhuah nghal a nih tur thu Union Power minister hian lo hrilhin, Mizoramah eng la dawng ve lo khua leh chhungkua an awmloh nan hma la turin a chah.
8 Mizoram leilung leh kawng awm danin a zir loh avangin scheme leh project hnathawhnaah bungraw phurhkualna man (transportation cost) a san bik dan P&E minister-in a hrilh chu Union minister hian a lo hriat thu sawiin, project proposal amount sang deuh bik a awm pawhin ngaihnathiamna nen an lo ngaihtuah tur thu a sawi.