Meitei-ten ILP an neihna turin MSU-in hma la tan

Mizo Students’ Union chuan Mizorama meitei awm turten inner line permit an neih a tulna turin hma an la tan a, Thawhlehni khan Home minister K Sapdanga an sawipui.
MSU Gen. Hqrs. hruaitute chuan Home minister hi hmuin Mizorama hnamdang khawsa meitei-ten ILP an neih ngei theihna atana hma la turin an thlen. Mizote inhungbikna, Bengal Eastern Frontier Regulation (BERF) 1873-in ILP a phut angin, ILP nei loa khawsa meitei-te chu ‘general category’ a nih angin ILP an neih a tul a, dan loa khawsa zawng zawng dap chhuak tur leh ILP an neih thuai theihna atana hma la turin a ngen.
Home minister chuan Home department hotute a lo sawipui tur thuin a lo hrilh a ni.
MSU hian state ramri depa sawrkar department hrang hrangah ram leh hnam himna atan leh buaina chhuah thila chak zawka hma lak theihna atan head of department-ah Mizo ngei dah turin an thlen a. Sawrkar laipuiin Free Movement Regime tihtawp tuma hma a lakna leh ramri hung a tum chu an duh loh thu leh state sawrkarin he thil a thlen lohna tura hma a lakna chu an thlawp thu an thlen bawk.